Balalar saýyqtyrý lagerinde bolǵan qaıǵyly oqıǵa! Jumbaq jaǵdaıda qaıtys bolǵan 15 jastaǵy jasóspirim jóninde tyń aqparattar shyqty. Andreı Semensovpen bir synypta oqyǵan qurbysy Eýrazıa birinshi arnasyna eksklúzıvti suqbat berdi. Oqýshy qyzdyń aıtýynsha, marqum sabaq kezinde "sýısıd" jóninde kóp aıtatyn deıdi. Biraq, onyń óz-ózine qol jumsaýyna senbeıtinin aıtady. Al, qaıǵyly oqıǵa oryn alǵan jerge jaýapty İshki ister departamentiniń málimetinshe, bala shomylýǵa tyıym salynǵan jerge túsip, batyp ketken. Al, jasóspirim oqyǵan bilim oshaǵynyń ustazdary qandaı da bir aqparat berýden bas tartyp otyr.

Bizge belgili bolǵandaı, marqum bolǵan 15 jastaǵy Andreı Semensov qaladaǵy dál osy 28-shi orta mektepte 8-synypta bilim alǵan. Qazir jaz mezgili bolǵandyqtan, oqýshylardyń barlyǵy demalysta. Al, mektep qyzmetkerleri bolsa, barlyq jaýapkershilikti Bilim basqarmasyna siltep, qandaı da bir jaýap berýden bas tartyp otyr".    

Esimin atamaýdy ótingen marqumnyń synyptasy Andreıdi óte jaqsy tanıtynyn aıtady. Birge emen-jarqyn aralasqan. Synypta óte belsendi bolǵan kórinedi. Túrli mekteparalyq is-sharalarǵa qatysqan. Biraq, sońǵy kezderi dostaryna ázil-shynyn aralastyryp sýısıd jóninde kóp sózder aıtqanyn aıtady. Degenmen, ómirge qyzyǵatyn dosynyń óz-ózine qol salǵanyna sengisi kelmeıdi. 

"Men Andreı Semensovtyń synyptasymyn. Biraq, men mektepke jańadan kelgendikten tek 1-aq jyl birge oqydym. Birden aıtarym, ol óte jaqsy bala bolatyn. Mektepte belsendi, únemi kóńildi júretin. Osyndaı qaıǵyly oqıǵa oryn alǵanyna áli de senbeı otyrmyn " – marqumnyń synyptasy.

Týystary bolsa, búgin marqumǵa arnap as berip jatqandaryn aıtyp, mazalamaýymyzdy ótindi. Al, qaıǵyly oqıǵa bolǵan aımaqqa jaýapty Aqmola oblystyq ishki ister departamenti ókilderi bul jóninde resmı málimdeme jasady.

«Bul is boıynsha QR Qylmystyq kodeksiniń 254-baby boıynsha  (mindetterine adal qaramaý)  sotqa deıingi tergeý amaldary júrip jatyr.  Anyqtalǵandaı Semensov A.D.  «Arman»balalar saýyqtyrý lagerinde bolǵan, ústimizdegi jyldyń 9 shildesi kúni kóldiń shomylýǵa tyıym salynǵan jerinde sýǵa batyp ketken». 

«Synyptasynyń aıtýynsha, marqum bolǵan Andreı Semensov, bul jazǵy demalys lagerine joldamany óz qarjysyna alǵan. Sondaı-aq, ol bilim alǵan 8 synyptan taǵy bir dosy sonymen birge demalýǵa barǵan kórinedi. Biraq, ony taba almadyq» - Aqmola oblystyq İshki ister departamentiniń resmı jaýaby.

"Sondaı-aq ol mektepte óte tanymal bolatyn. Men áli synyptasymnan, dosymnan aıyrylyp qalǵanymyz ókinishti. Ata-anasyna kóńil aıtamyn. Kináliler tabylyp, jazasyn alsyn" – deıdi marqumnyń synyptasy.

 Dosynyń kináliler tabylyp, jazasyn alsyn deýi beker emes sıaqty. Óıtkeni, ony áldekimder uryp-soǵyp, sosyn denesin sýǵa tastap ketken degen de dolbarlar aıtylǵan edi. Alaıda, bul fakti áli rastalǵan joq. Al, marqumnyń nelikten tyıym salynǵan jerde shomylǵany ázirge anyqtalý ústinde. Tipti, bul jumbaq isti oblystyq prokýratýra óz baqylaýyna alǵan kórinedi.

Biraq, marqumnyń ata-anasy áli kúnge deıin tergeýshilermen betpe-bet kezdespegen. Qaıǵydan qan jutqan marqumnyń ákesi bizge telefon arqyly balanyń denesinde isikter men jaralar bolǵan. Ol Kókshetaýǵa tek erteń attanatynyn aıtty. Al, bul iske  Bilim jáne ǵylym mınıstriliginiń ókilderi mardymdy jaýap bere almady.    

"Bul bizde lısenzıalanbaıtyn qyzmet túri. Sondaı-aq atalmysh uıym bilim berýdiń qosymsha túrine jatady, ıaǵnı túrli lagerdegi úıirmeler, til ortalyqtary taǵy basqa. Bul qyzmet túri básekelestik joǵary orta. Munyń barlyǵyn biz jan-jaqty arnaıy tekseris kezinde suraıtyn bolamyz" – deıdi QR Bilim jáne ǵylym vıse-mınıstri Bıbigúl Asylova.  

Ata-analar óz qolymen perzentterin jerlemeýi qajet! Osylaı búginde 15 jastaǵy Andreı Semensovtyń jumbaq ólimi qoǵamdyq qyzý pikirtalas týǵyzdy. Qaıǵyly oqıǵa 9 shilde kúni "Arman" balalar lagerinde bolǵan. Aldyn-ala aqparattarǵa sensek, jetkinshek sýǵa batyp ketken. Oqıǵanyń jaı-japsaryn bizdiń arna basty nazarda ustaıtyn bolady.