Bir apta boıy almatylyqtardyń basty talqylaıtyn taqyryptary "Atakent" aldyndaǵy alyp tıin boldy. 23 mıllıon teńge jumsalǵan músindi turǵyndar jerden alyp, jerge saldy. Biri qomaqty qarjynyń qajetsiz dúnıege jumsalǵanyn aıtyp nalysa, endi biri músinnen mán-maǵyna izdep álek. Alaıda qansha aıtyp taýsylǵanymyzben tıin jasaldy, qalanyń ortasynda móldirgen janarymen almatylyqtarǵa kóz salyp tur. Al dál sondaı alyp músin elordada paıda bolsa she? Astana ákimdigi osyǵan qatysty pikir bildirdi. 

Kelisim jáne beıbitshilik saraıy mańynda alyp tıinniń músinin ornalastyrýdy Astana ákimdigi qajet dep sanamaıdy.

«Jyl basynda mundaı usynys aıtylǵan, alaıda ol talqylanbady», - dedi «NIPI «Astanagenplan» JSHS dırektorynyń orynbasary Asqat Sadýov.

Al elordaǵa ondaı tıinniń qajettiligi jaıly suraǵanda Sadýov búı dedi.

«Astanaǵa el túsinetin art-baǵdarlama kerek. Tıin bolsyn, saryshunaq, masa nemese torǵaı bolatynyn sýretshiler sheshedi, eń bastysy halyqqa túsinikti bolý kerek. Munyń bári óner, tek baǵdarlama kerek», - dep túsindirdi Asqat Sadýov.

Budan buryn elordada alyp saryshunaqtyń músinin ornatý usynylǵan edi. Avtorlardyń ıdeıasyna sáıkes, janýar eki qolyn ishine qoıyp turýy tıis edi. Músindi jasaý úshin Reseıden arnaıy maman shaqyrylǵan. Reseılik maman Sergeı Kovalevskıı ıdeıany jandandyrý úshin belgili golandıalyq sýretshi Florentına Horfmannyń kómegine júginýdi usyndy.