Astanadaǵy balabaqshalardyń birinde tárbıeshiniń balalardy urǵan vıdeosy áleýmettik jelide tarady. Vıdeony óz paraqshasyna salǵan Aıda Jeksen esimdi Facebook qoldanýshysy oqıǵanyń elordadaǵy «Káýsar» balabaqshasynda bolǵanyn jazdy.

«Balańyzdy balabaqshaǵa berip qoıyp, alańsyz uıyqtap jatsyz ba? Myna balalardyń da ata-anasy Astanadaǵy «Káýsar» balabaqshasyna balalaryn tapsyryp, óz jumystarymen aınalysyp júr. Al balańyz úıge kelip, ózin uryp júrgenin aıtsa she?..

Sený qıyn. Balabaqshanyń ózi de, basshylyǵy da jaqsy sekildi. Alaıda ata-analar balabaqshanyń ishindegi jaǵdaıdy óz kózderimen kórgende abdyrap qaldy. Sener-senbesin bilmeıdi. Bar baǵalysyn tárbıeshiniń qolyna tapsyrdy. Al tárbıeshi balalarǵa qýyrshaq sekildi qaraıdy. Bóten bireý vıdeony kórgende aıtarlyqtaı áser almaýy múmkin. Jaı ǵana talqylap óte beretin shyǵar. Alaıda tósekte jatqan balalardyń ata-anasy tynysh otyra almaıdy. Balaqaılarynyń senip tapsyrylǵan jerde qorlyq kórip jatqandaryna kóz juma almaıdy», - dep jazdy Aıda Jeksen.

Áıeldiń aıtýynsha, ata-analar tıisti organdarǵa aryz jazdy. Basshylyq jaýapkershilikten taıyp turmas úshin isti ózderi baqylaıtyn bolady.

Sábılerdiń biriniń anasy Kámıla Seıitqalıeva da óziniń Instagram-daǵy paraqshasynda tárbıeshiniń jańadan kelgenin ári jasy 35-te ekenin jazdy. 

Balabaqshadaǵy mundaı jaǵdaı alǵashqysy emes. Búginge deıin túrli qalalardan balalardy uryp, ne dórekilik tanytyp júrgen tárbıeshilerdiń sany kóp. Tek jaza mardymsyz. Muny qolǵa alyp jatqan arnaıy organ da joq. Bar bolǵannyń ózinde, tym-tyrys...