«El Frıman» kórkem fılmi ústimizdegi jyly shilde aıynyń 21-i men 28-i aralyǵynda Madrıd qalasynda ótip jatqan halyqaralyq kınofestıvalge qatysady, dep habarlaıdy Qamshy.kz
Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ jaryqqa shyǵarǵan kınotýyndy «Úzdik operator» jáne «Úzdik rejıser-debútant» nomınasıalarynda baq synaıdy.
Rejıser-debútant Eljas Raqymbekov (shyǵarmashylyq laqap aty Mıhar Sajle) pen Antonıo Chaves túsirgen kartına Los-Andjeleste amerıkandyq úkimetten jasyrynyp júrgen ımıgranttyń ómiri týraly baıandaıdy.
- Festıválden tek jaqsy jańalyq kútemiz. «Úzdik rejıser-debútant» júldesine úmitkerler qataryna engenimizge qýanyshtymyn. Árıne, júldeli orynnan kórinetinimizge senimdimin. Fılmniń operatory Erık Konash «Úzdik operator» júldesine laıyq dep oılaımyn, - dedi fılmniń so-rejısseri Eljas Raqymbekov.
Madrıd qalasynda jyl saıyn ótkiziletin halyqaralyq kınofestıvalde túrli elden kelgen kınoındýstrıanyń ókilderi, atap aıtsaq, jas kınogerler men kásibı rejıserler, dıstrıbútorlar men basqa da mamandar bas qosady. Kınematografıanyń barlyq belgili janrlaryna esigi ashyq bul festıválde jas býyn rejıserlerge, zamanaýı tendensıalar men kıno salasynyń damýyna yqpal jasaıtyn trendterge asa kóńil bólinedi.
Sh.Aımanov atyndaǵy «Qazaqfılm» AQ jáne Libertus Films túsirgen 77 mınýttyq, drama, krımınal janryndaǵy fılmde El – Los-Andjeleste amerıkandyq bılikten jasyrynyp júrgen ımıgrant. Ol óz kóliginde túnep júrip, júk tasýshy bolyp jumys isteıdi. El dosy Artýrmen birge kiltterdiń kóshirmesin jasap, kompanıanyń burynǵy klıentterin tonap, kúnin kóredi. Bir kúni olar baı, biraq jalǵyzbasty Ambassador esimdi qarıamen tanysady...
Fılm rejıseri Eljas Raqymbekov - aktór, senarıst, rejıser. «Lıbertýs» kınolaboratorıasynyń negizin qalaýshy (2014, Nevada, AQSH). Halyqaralyq «Eýrazıa-2015» kınofestıvali «Work-in-progress» nomınasıasynyń jeńimpazy («El Frıman» kórkem fılmi, Almaty, Qazaqstan); Tallın-2015 halyqaralyq kınofestıvaline qatysqan; Qazaqstan kınosynshylary qaýymdastyǵy sheshimimen «Ekinshi plandaǵy úzdik er adam róli» nomınasıasyna úmitker bolǵan («Arman», 2017, rej. Rashıd Súleımenov).
Antonıo Chaves Meksıkanyń «MVS Exa TV» telearnasy úshin kóńil kóterý baǵdarlamalardy jaryqqa shyǵaratyn iri kompanıalarynyń birinde rejıser jáne prodúser bolyp qyzmet atqardy. Sondaı-aq marketıń jáne jarnama salalarynda jumys istegen. 2009 jyly ol «Carta Entretenimiento» kompanıasyn qurdy.
