Almatydaǵy avtobýstardyń soqtyǵysýy saldarynan zardap shekken jolaýshylardyń jaǵdaıy týraly dárigerler aıtyp berdi. Bul týraly Qamshy.kz aqparat agenttigi tengrinews.kz portalyna silteme jasap habarlaıdy. 

Almaty qalasy densaýlyq saqtaý basqarmasynyń basshysy Nurjan Isabekovtiń málimetinshe, apattan 21 adam zardap shekken eken, onyń úsheýi balalar. 16 adam úılerine qaıtaryldy, alaıda dárigerdiń baqylaýynda bolady. Bes adam aýrýhanaǵa jatqyzyldy.

Bes adamnyń úsheýi qalalyq jedel-járdem aýrýhanasyna jetkizildi, al ekeýi ortalyq klınıkalyq aýrýhanada. İshinen jaraqat alǵan 46 jastaǵy er adamǵa ota jasaldy.

«Pasıentterdiń jaǵdaıy qalypty. Aýyr halde jetken eshkim joq. Eń kishi pasıenttiń jasy – 6-da, al úlkeni – 60-ta», - dedi Isabekov.

Aıta keteıik, 2018 jyldyń 22 shildesinde eki avtobýs betpe-bet soqtyǵysyp qalǵan. Jol apaty Almatydaǵy Dostyq dańǵylynyń boıy, Qurmanǵazy men Abaı kósheleriniń ortasynda boldy.

«Almatyelektrkólik» JSHS basshysy Rızvan Tynaevtyń aıtýynsha, jol apaty jaıly tolyq aqparat tergeý jumystary aıaqtalǵan soń jarıalanady. Anyqtalǵan derekterge sáıkes, júrgizýshi qol tejegishin salmaǵan. Onyń ústine soqtyǵysqan avtobýstar jańa bolǵan.