Almaty qalasyndaǵy №6 kitaphanada aqyn, halyqaralyq «Alash» ádebı syılyǵynyń laýreaty, «Qazaq úni» gazetiniń bas dırektory Qazybek Isamen Astananyń 20 jyldyǵyna oraı kezdesý ótti. Atalmysh sharany Almaty qalasy İshki saıasat basqarmasynyń tapsyrysymen «El-shejire» qoǵamdyq qory uıymdastyrdy.
İs-shara barysynda Qazybek Isa Astanany kóshirý jaıyndaǵy sheshimniń durystyǵyn alǵa tartty. Óıtkeni bul sol ýaqyttaǵy tilimizdi, dinimizdi saqtap qalýdyń bir joly bolǵanyn eske saldy. Sondaı-aq, «Men ulttyq patrıotızm jolynda qyzmet jasap júrgen azamatpyn. Osy taqyrypqa baılanysty barlyq sheshimdi qos qoldap qoldaımyn. Astanany Alataýdan arqaǵa aýystyrý mańyzdy ári jaýapkershiligi joǵary jumys edi. Orystanǵan ultymyzdy qazaqylandyrýdy kózdedik. Búginde óz nátıjesin kórsetti. Mine sol 20 jyl burynǵy qalaýymyz oryndalyp, egemendi eldiń urpaǵyna aınaldyq. Ana tilimizdiń de baǵasy kóterilip, qadiri artyp keledi. Óz tilimizde sóıleıtinder kóbeıdi. Tipti kez-kelgen mekemege baryp qazaq tilinde qyzmet kórsetýin talap ete alamyz. Bunyń barlyǵy bizdiń jetken jetistigimiz deýge bolady» - dedi.
Sonymen qatar, Astana barlyq mádenı, ádebı, ǵylymı, saıası mekemelerdiń oshaǵyna aınalyp úlgergendigin tilge tıek etti. Arqa tósine tek halyqty emes, úlken ǵımarattar men basty korpýstardy ornalastyrǵandyǵy jaıynda oı qozǵady. Aqyn «Negizgi júıe, mańyzdy sheshimder Elordada qabyldanady. Az ýaqyt ishindegi Astanany aýyz toltyryp aıtýǵa bolady. Al aldaǵy damýymyz budan da qarqyndy bolaryna kúmánim joq»- dep jigerlene, úlken senimmen sóıledi.
Kezdesýge kelgen stýdent jastar Astana jaıyndaǵy óleńderin oqydy. Al suraqqa durys jaýap bergenderge kitaptar syıǵa berildi.