"Aıtqanym sizge unamas. Biraq aqıqatty aıtatyn kez keldi dep oılaımyn. Ony dál qazir qabyldaı almasańyzdar da, bolashaq urpaq túsinedi degen zor úmittenemin. "Qazaqtyń maqtanyshy kim?" deseń, bári "Abaı" deıdi. Men munymen kelispeımin. Abaıdy óz basym moıyndamaımyn. Abaı qandaı jaqsylyǵy úshin osynshalyqty dáripteledi? Qıyn-qystaý zamanda qol bastady ma álde el basqardy ma? Ol tipti aýyl basqarǵan emes. Abaı aqyldy, jaqsy adam. Biraq búkil qazaq úlgi bolarlyqtaı kemeńger tulǵa emes. Osyny eskerseńizder. Abaıdyń ákesi Qunanbaıdyń azamattyǵyna sóz joq. El basqardy. Shynymen de úlgi bolarlyq tulǵa. Abaı bizdiń zamanymyzda ómir súrse, ári ketse tanymal bloger ǵana bolatyn edi. Bul týraly ol óz kitabynda syr aqtarǵan bolatyn. Birinshi qara sózinde "osy jasqa kelip ne bitirdim, endi ne istemekpin" degen oıǵa keledi. Ol kezde Abaı 45-te bolatyn. Demek 45 jasqa deıin Abaı túk bitirmegen. Qur qydyrǵan, dombyra tartqan. Eshnárse istegisi kelmegen" deıdi kásipker Nurlan Baıdildá. "Osynyń bárin ne úshin aıtyp otyrmyn, maqsatym ne?" degen suraqqa ózi bylaı dep jaýap qatady kásipker: "Keńes úkimeti qazaqtyń ıgi jaqsylaryn qurtyp tyndy. Biraq halyqty aldaı turýy shart edi. Sondyqtan úlgi bolarlyq tulǵa retinde Abaıdy tańdap aldy. Áýezov bolsa artylǵan mindetti joǵary deńgeıde atqaryp shyqty. Abaı jaqsy jarnamalap berdi. Biz áli kúnge deıin Abaı sıaqtymyz. Qazaq otyryp alyp oılanǵandy, aspanǵa qarap armandaǵandy, eshnárse isteýge qulqy joq, ómirden baz keshýge daıar. Munyń bári sol ıdeologıanyń, jaqsy pıardyń tikeleı áseri. Shyn mánisinde qazaqta úlgi bolarlyq tulǵalar kóp. Kereı men Jánibek, Qasym han, Abylaı handar naǵyz azamattar. Solar sıaqty bolýǵa umtylýymyz tıis. Sonda ǵana myqty bolamyz. Erikkennen Abaıǵa tıisip otyrǵanym joq. Qazaqtyń naǵyz qaısar azamattardy úlgi qylyp, solarǵa qarap boı túzegenin qalaımyn" dep sózin aıaqtady Nurlan Baıdildá.