Alakól aýdanynyń Qabanbaı aýylynda «Bári de rahmet úshin!» atty áleýmettik dúkeni ashyldy. Aýdandaǵy tuńǵysh qaıyrymdylyq dúkeni Kásipkerler palatasy janyndaǵy İsker áıelder keńesiniń bastamasymen qurylyp, «Iskorka» sýpermarketinde ornalasty.

Muqtaj aýyl turǵyndary, otbasylar men erekshe qajettiligi bar balalar úshin tegin túrde azyq-túlik pen sharýashylyq taýarlary, kıimder men mektep zattary beriledi.

««Bári de rahmet úshin!» dúkenine bizdiń kásipkerler men aýyl turǵyndary belsendi qoldaý bildirdi. Bastamaǵa óz úlesin qosýǵa barlyq azamattardy shaqyramyz. Bastysy, bul bir rettik shara emes, kómek turaqty túrde kórsetilip otyrady», - deıdi dúken jetekshisi, kásipker Ǵalıa Kenjasarova.

Aıta keteıik, qaıyrymdylyq kórsetý ornyn ashý týraly usynys osyǵan deıin Alakól aýdany isker áıelderiniń birinshi forýmynda aıtylǵan bolatyn.

«Qabanbaı aýylynyń áıel kásipkerleriniń bastamasy qazirgi kezdegi óte qajetti jáne mańyzdy is dep oılaımyn. Óıtkeni, bizder bolmasaq, qıyn jaǵdaıǵa tap bolǵandarǵa qol ushyn kim beredi?! Osylaısha bir aýyzdan jasalǵan kómek muqtaj azamattardyń qulazyǵan kóńilderine demeý bolady», - dep atap ótti Alakól aýdany İsker áıelder keńesiniń tóraıymy Barshagúl Saıatova.

Eske salsaq, «Bári de rahmet úshin!» áleýmettik dúkenderi Taldyqorǵan, Tekeli, Qapshaǵaı qalalarynda, sondaı-aq, Aqsý, Qaratal, Kerbulaq, Raıymbek, Talǵar aýdanynda jumys isteıdi.