Indonezıada bolǵan jer silkinisinen qaza tapqandar men zardap shekkender arasynda Qazaqstan azamattary joq dep málimdedi Qazaqstan Syrtqy ister mınıstrligi (SİM). Bul týraly Qamshy.kz aqparat agenttigi Azattyqtyń málimetine súıenip habarlaıdy. 

Mınıstrliktiń baspasóz hatshysy Aıbek Smadıarovtyń aıtýynsha, Indonezıanyń Tabıǵı apattarmen kúres agenttigi Qazaqstan konsýlyna bergen aldyn ala aqparatyna sáıkes, jer silkinisi saldarynan zardap shekkender men qaza tapqandar arasynda qazaqstandyqtar joq.

Indonezıanyń Lombok aralynda 5 tamyz kúni qýaty 7 magnıtýdaǵa jetetin jer silkinisi bolǵan. Sońǵy málimet boıynsha, jer silkinisinen kem degende 91 adam qaza taýyp, júzdegen adam jaralandy.

Indonezıa bıliginiń habarlaýyna qaraǵanda, zilzaladan araldyń soltústiginde ondaǵan ǵımarat búlindi. Qutqarýshylar keıbir qırandylar ornyna áli jete almaı jatqandyqtan qurbandar sany ulǵaıýy múmkin.

Tabıǵı apattarmen kúres agenttigi ókili araldyń basty qalasy Mataramda kóptegen ǵımarat zardap shegip, qalanyń biraz aýdany elektr qýatynan ajyratylǵanyn aıtady.

Zilzala dúmpýi Lombokke jaqyn Balı aralynda da sezildi.

Týrıser kóp baratyn Lombok aralynda bir apta buryn da jer silkinip, 16 adam qaza tapqan.