Arystanbek Muhamedıuly jáne qazaqstandyq tanymal tulǵalar Almaty oblysynda ótken atpen júrý jarysyna qatysty. Tanymal memleket qaıratkerleri, bıznes ókilderi jáne sportshylardyń qatysýymen Almaty oblysynyń taýlarynda keń kólemdi atpen júrý jarysy bolyp ótti, dep habarlaıdy Qamshy.kz aqparat agenttigi.
Alakól aýdanynyń Lepsi aýylynda respýblıkalyq deńgeıdegi atpen júrý jarysyna qatysýshylar 1 500 metr bıiktikte ornalasqan Jamantas jaılaýyna deıin Jońǵar Alataý taýlarynyń shatqaldarymen 50 km qashyqtyqta atpen júrip ótý úshin jınaldy.
Qatysýshylar arasynan QR mádenıet jáne sport mınıstri Arystanbek Muhamedıuly, Almaty oblysynyń ákimi Jaqsylyq Omarov, Alakól aýdanynyń ákimi Álibek Jaqanbaev, «Qazmunaıgaz» AQ basqarmasynyń tóraǵasy Saýat Myńbaev, kásipker, mesenat «Zhersu» ınvestısıalyq-óndiristik qadaǵalaý keńesiniń tóraǵasy Baýyrjan Ospanov, kásipker Edýard Kım, grek-rım jáne erkin kúres boıynsha Qazaqstan federasıasynyń vıse-prezıdenti Erlan Kojasbaı, sondaı-aq 2004 jylǵy boks boıynsha olımpıada chempıony, Vela Barker Kýbogynyń ıegeri, Astana Arlans boks klýbynyń bas menedjeri Bahtıar Artaev, boksshy Qanat Islam,
2008 jylǵy grek-rım kúresinen olımpıada oıyndarynyń kúmis júldegeri Nurbaqyt Teńizbaev syndy ataqty sportshylardy baıqaýǵa bolady.
Atpen júrý jarysyna qatysýshylardyń mejege jetý ýaqytyna shekteý bolǵan joq, alaıda alǵashqy salt attylardyń biri belgilengen jerge 4 saǵattan astam ýaqyt ótkende baryp jetti. Tipti atpen júrýge aldyn-ala daıyndalǵan qatysýshylar barlyq joldarmen joǵary qaraı kóterilýdiń ózi asqan qyraǵylyqty qajet etetin qıyn synaq bolǵanyn jasyrmady. Jolsyz jerlerde júretin baqylaýshy kólikter tik jartastarǵa ulasa beretin betkeılermen jaǵalaı júrip kele jatqan salt attylardyń izimen qıyndyqpen júrip otyrdy.
Mádenıet jáne sport mınıstri Arystanbek Muhamedıuly óziniń quttyqtaý sózinde mundaı saıahatqa shyǵýdyń maqsaty – ejelgi ata-babalarymyzdyń salt-dástúrin kópshilik qaýymǵa jáne sheteldikterge keńinen tanystyrý ekenin aıryqsha atap aıtty.
Baýyrjan Ospanov atpen júrý jarysyn uıymdastyrýda belsendilik tanytty. Ol mundaı sporttyq sharalardyń uıymdastyrylýy elimizdiń sulý tabıǵatyn álemniń barsha halqyna pash etýge septigin tıgizetinin aıtty. Alakól jaǵalaýynda dýatlon boıynsha ótken jarysty mysal retinde keltirdi. Onyń pikirinshe, bir mezette osyndaı atpen júrip ótý jarysy qazaq halqynyń dástúrlerimen tanysýǵa múmkindik beredi.
