Qazaqstandyq júzdegen kompanıa men bankter, tipti úkimettik organdar hakerlerdiń qurbanyna aınala jazdady, dep habarlaıdy 24.kz.

Anyqtalǵandaı, eń kóp qoldanystaǵy elektrondy qujat almasý júıesinde kinárat bar bolyp shyqty. Sarapshylardyń aıtýynsha, qupıa qujattar kıber shabýylshylarǵa jarıa bola jazdaǵan.

Júıeniń shıkiligi elimizdegi kóptegen kásiporynnyń berekesin qashyrdy. Óıtkeni baǵaly qaǵazdar, qupıa qujattar qylmyskerler qolyna túse jazdaǵan. Al qujat almasýdyń bul túrin ulttyq kompanıalardan bastap mınıstrlikter men bankter, tipti aýrýhanalar da qoldanady. Elimiz boıynsha shamamen 200-ge jýyq mekemeniń deregi osynda saqtaýly.

Oljas Satıev, saraptama jáne kıber shabýyldardy tergeý ortalyǵynyń prezıdenti:

- Barlyq aqparat osy júıe arqyly ótedi. Ol naryqtyǵy úzdikterdiń qatarynda. Biz olqylyq tapsaq, demek júıeniń abyroıyna ádeıi nuqsan keltirilgen. Óıtkeni olar 10 jyldan beri naryqta. Bul kemshilikti sheteldik hakerler birneshe jyl buryn anyqtap, aqparat jınaýy múmkin.

Elektrondy qujat almasýdyń aqyldy júıesin oılap tapqan kompanıa, qatesin shuqyp kórsetken sarapshylarǵa alǵys aıtýǵa asyqpaıdy. Olardyń aıtýynsha, bul olqylyqty anyqtaý úshin sarapshylar júıeni zańsyz buzyp kirgen. «Al bul qylmys», - deıdi seriktestik ókilderi.

Baıjan Kanafın, seriktestik basshysy:

- Álbette, bul aqparat biz úshin mańyzdy. Bizge kórsetti, qatemizdi túzedik. Mundaı Google-da da, Microsoft-ta da bolady. Bul aqparat júıe tutynýshylaryn kádimgideı ábigerge saldy. Keıbiri tipti shuǵyl jınalys ótkizipti. Biz tildesken sarapshylar «bulaı dúrligýdiń jóni bar» deıdi. Óıtkeni memlekettik qupıalarǵa qaýip tóndi. Sondyqtan mamandar eldiń qaýipsizdik keńesine shaǵymdanypty. Al júıe qoldanýshylaryna tez arada qupıa sózderin aýystyryp, arnaıy tekseris júrgizýge keńes beriledi.