Qazaqstan Prezıdenti Nursultan Nazarbaev Reseı Federasıasynyń Prezıdenti Vladımır Pýtınmen kezdesti, dep habarlaıdy Qamshy.kz aqparat agenttigi Aqordanyń baspasóz qyzmetine silteme jasap.

Memleket basshysy Reseı Federasıasynyń Prezıdentine yntymaqtastyq úshin jańa múmkindikter men perspektıvalarǵa jol ashatyn Kaspıı mańy elderiniń aıtýly samıtine belsendi atsalysqany úshin rızashylyq bildirdi.

"Eki jaqty qarym-qatynastarymyz barlyq baǵytta, ásirese, ekonomıka, áskerı-tehnıka jáne ǵarysh salalarynda ilgerilep keledi. Eýrazıalyq ekonomıkalyq odaq aıasyndaǵy ekonomıkalyq máseleler de qarqyndy damýda", – dedi Qazaqstan Prezıdenti.

Vladımır Pýtın Nursultan Nazarbaevty Kaspıı mańy elderi samıti jumysynyń nátıjelerimen quttyqtap, munyń Qazaqstannyń ózinde bolǵan oqıǵa retinde tarıhqa enetinin aıtty.

"Bul – jıyrma jyl ishinde qol jetkizilgen eleýli oqıǵa. Uzaqqa sozylǵan talqylaýlar men pikirtalastardan keıin sheshim tabyldy. Osy sheshimniń Kaspıı mańy óńirindegi yntymaqtastyǵymyzdyń damýyna septigin tıgizetini sózsiz", – dedi Reseı Federasıasynyń Prezıdenti.

V.Pýtın eki el arasyndaǵy ózara taýar aınalymynyń artqanyn atap ótip, barlyq iri jobalar men baǵdarlamalar, sonyń ishinde ǵarysh, energetıka jáne kólik salalary odan ári damı beretinin, sondaı-aq elderimizdiń oń nátıjelerge qol jetkizetinine senim bildiretinin aıtty.

"Sizge Reseı men Qazaqstan qarym-qatynastaryna erekshe kóńil bólgenińiz úshin rızalyǵymdy bildirgim keledi", – dedi Reseı Federasıasynyń Prezıdenti.

Sonymen qatar, taraptar aldaǵy ýaqytta ótetin Petropavl qalasynda ótetin óńiraralyq forýmnyń jáne Dýshanbede bolatyn TMD samıtiniń máselelerin talqylady.