petitions247.com saıtynda Lázzat Ahatova hanym «Pedofılderge ólim jazasy taǵaıyndalsyn!» degen petısıaǵa qol jınaýdy bastady. Almaty oblysynda bir apta kóleminde bes balanyń pedofıldiń qurbanyna aınalǵandyǵy jónindegi aqparat Qamshy betinde jarıalaǵan bolatyn. Aıtpaǵymyz, balanyń ómiri oıynshyqqa aınalǵan zamanda portal petısıany oqyrman nazaryna usyna otyryp, atalmysh másele boıynsha únsiz qalmaýǵa shaqyrady.

«Qurmetti Nursultan Ábishuly!

     Qazirgi tańda elimizde sábı zorlaý faktisi kúnnen-kúnge kóbeıip barady. Birer jyl burynǵy alty jasar qyz balanyń ólimi, saryaǵashtyq jeti jasar balanyń zorlanýy, Qyzylordadaǵy toǵyz jasar qyzdyń anasyn óltirip, ózin zorlaýy, Almaty oblysyndaǵy alty jasar qyzdyń zorlanýy, taǵy sol sıaqty sumdyq oqıǵalardy kún saıyn aqparat alańynan oqımyz, estımiz. Almaty oblysynyń ózinde bir aptada bes sábı pedofılderdiń qurbany bolǵany jóninde aqparat bar. 

    Bundaı sumdyqtar azaıýdyń ornyna, kún sanap órship jatyr. Quqyq qorǵaý organdarynyń statısıkasynda da pedofıldik sıpattaǵy  qylmystar  jyldan-jylǵa ósip jatqany kórsetilgen. Balalardyń taǵdyryna alańdaýly ata-ananyń, eldiń ashý-yzasy, ýaıymy, qorqynyshy da kún sanap ósip barady...

    Osyǵan oraı, xalyq arasynda  pedofılderdi ólim jazasyna kesip, el aldynda jazalaý kerek degen pikir kóptep aıtylyp jatyr. Bul xalyqtyń basym kópshiliginiń tilegi! Birqatar elderde pedofılderge ólim jazasy qoldanylyp jatyr.

    Qurmetti Elbasy, Sizden ultymyzdyń bolashaǵy - balalarymyzdyń taǵdyryna janashyrlyq tanytyp, atalǵan qylmystardy jasaǵan pedofılderdi qatań túrde jazalaýdy, ıaǵnı ÓLİM JAZASYNA kesýdi zańǵa engizýdi elimizdegi Analardyń atynan, jalpy kópshiliktiń atynan suranamyz». 

Axatova Lázzat Kendebaıqyzy