Semeı qalasynyń ákimi Ermak Sálimov «Semeı-Novosibir» baǵytyndaǵy órtengen avtobýstan 48 jolaýshyny qutqarǵan Erjan Amarhanovpen kezdesti, dep habarlaıdy Qamshy.kz aqparat agenttigi QazAqparatqa silteme jasap. 

Eske sala keteıik, tamyzdyń 4-inen 5-ine qaraǵan túni «Semeı - Novosibir» baǵytyndaǵy jolaýshylar avtobýsy órtke oranǵan bolatyn. Sol avtobýsta otyrǵan 37 jastaǵy semeılik Erjan tilsiz jaýdan 48 jolaýshyny jalǵyz ózi qutqardy. 

Ol adamdardy syrtqa shyǵaryp, jantalasyp júrgende onyń qujattary men kólik satyp alý úshin alyp shaqqan 1,4 mln teńgeden astam aqshasy janyp ketti. Qala basshysy beıbit kúnniń batyryn jeke qabyldady. Ermak Bıdahmetuly  azamattyq, erlik tanytqan úshin Erjanǵa  rızashylyǵyn bildirdi. 

«Saǵan azamattyq kórsetkeniń úshin alǵys aıtamyn. Naǵyz er jigitke tán qasıet tanyttyń. Kez-kelgen adam óz basyn qaterge tigip, erlik jasaı bermeıdi», - dedi qala ákimi.

Qazirgi ýaqyttta   janyp ketken barlyq qujattaryn rásimdeý boıynsha  jumystar júrip jatyr. Novosibir qalasynan  kólik alýǵa dep jınaǵan qomaqty qarjysynyń  janyp ketýine baılanysty, jergilikti kásipker  «Gordorstroı» JSHS dırektory Baýyrjan Qaırambaev 1 mıllıon teńge berdi. Qala ákimi Ermak Sálimov onyń jeke ómiri, otbasy týraly bilip,  jergilik bılik  kómek kórsetýge daıyn ekenin jetkizdi. Búginde Erjan bos ýaqytynda jas sportshylardy kúreske jattyqtyrýmen aınalysady. Bul baǵyttaǵy jumystaryna aldaǵy  ýaqyttta Ermak Bıdahmetuly  qoldaý bildiretinin aıtty.