Astana qalasyndaǵy №2 qalalyq aýrýhanada emdelýshi «quqyǵynyń taptalǵanyn» aıtyp Facebook paraqshasynda jazba qaldyrypty. Qulaǵyna operasıa jasatyp, keıin palataǵa aýystyrylǵan Muqaǵalı Balqybaev aýrýhana ishinde memlekettik tildiń qorlanǵanyn aıtyp, ashynyp otyr. Tipti qyzmetkerlerden qazaq tilinde sóıleýin talap etkeni úshin tolyq emdelmeı jatyp aýrýhanadan shyǵyp qalýy ábden múmkin eken.

Ult, til máselelerinde qashan da qalam qozǵaýǵa daıyn Qamshy.kz aqparat agenttigi emdelýshimen tildesip, istiń mán-jaıyn anyqtady.

Aıtýynsha, 27 tamyz qulaǵyna operasıa jasatyp, sol kúni keshke «Otolarıngologıa» bólimshesiniń 9-palatasyna jatqyzylǵan. 28 tamyz memlekettik tildi qorǵaımyn dep óz dárigerinen dóreki sóz estigen.

«Tańerteń palatamyzǵa tazalyq qadaǵalaýshysy kelip, orys tilinde birnárse aıtty. Men oryssha túsinbeıtinimdi aıtyp, memlekettik tilde sóıleýin talap ettim. Oǵan tolyq quqyǵym bar dep oılaımyn. Biraq álgi áıel ózime tap berdi. Qazaq tilinde sóılemeıtinin aıtyp, dárigerime shaǵymdanypty. Biraz ýaqyttan keıin palataǵa Asqat Nıkolaıuly keldi. Qazaq kisi edi. Meni qoldap, eń bolmaǵanda keshirim surar dep oıladym. Qıalym eken. «Saǵan kim qandaı tilde sóılese, sen de sol tilde jaýap berýge tıissiń. Elbasymyz úsh tilde sóıleý kerek dep eskertti. Qyzmetkerlerden qazaq tilinde sóıleýin talap ete almaısyń!» dep adýyndy sóıleı bastady. Biraq kónbesimdi baıqap aýrýhanadan shyǵaryp jiberemin dep qoqan-loqy kórsetti. Tipti shyǵarý anyqtamalaryn da orys tilinde jazyp beretinin aıtty. Memlekettik tilde sóıleý bylaı tursyn, ony qurmettemeıtinderdi qalaısha jumysqa alady?», - dep ashýǵa býlyqty Muqaǵalı.

Buǵan qosa, emdelýshiniń sózine sensek, aýrýhananyń ishinde ózińdi Reseıdiń bir qalasynda júrgendeı sezinesiń. Sebebi palata esikterindegi jazýlar túgeldeı derlik tek orys tilinde jazylǵan. Kúıingen qazaq bul jaǵdaıǵa arasha túsetin namysshyl baýyrlarǵa úndeý saldy.

Al búgin odan soraqysy oryn alǵan kórinedi. Naýqastarǵa tańǵy astaryn ákelgen qyzmetshi de memlekettik tilden maqurym bolyp shyqty. Ol da qazaq tilde sóıleýin talap etken emdelýshige dóreki jaýap qaıtardy. Tańǵy asyn ýǵa teńegen Muqaǵalı qazaq baýyrlarynan kómek surap otyr.

Bolǵan jaǵdaı jeli qoldanýshylary arasynda rezonans týdyrdy. Biri qazaqtardy basynǵan orys tildilerge degen ashýyn bildirse, endi ózgesi zańda naqtylyq joq dep Konstıtýsıany retteý kerektigin aıtyp, jar saldy.