Aıda Kolpakova esimdi feısbýk qoldanýshysynyń óziniń jeke paraqshasynda jarıalaǵan jazbasy oqyǵan adamdy beıjaı qaldyrmasy anyq. Sebebi fotosynan kózderi kúlimdep turǵan, túrli-tústi kóılek kıip alyp, baqyttan bal-bul jaınaǵan múmkindigi shekteýli úsh kishkentaı qyzdy kóre alasyz. Olar fotokamera obektıvine kúlimdep turǵanymen, anasynyń júregi qan jylap turǵan sát. Máseleniń mán-jaıyn tarqatyp aıtsaq, 29 tamyzda Astana qalasynda Aqtóbe oblysynyń kúni ótkizilipti. Elbasy men astanalyq ákimıat tamashalaıtyn atalmysh merekelik is-sharada Aıdanyń balasy da bı bıleýi kerek edi. Alaıda arbaǵa tańylǵan bıshi qyzdardy konsert uıymdastyrýshylary sahnaǵa shaqyrmaǵan. Keıinnen belgili bolǵandaı, tipti repetısıa kezinde de múmkindigi shekteýli balalardy aldyńǵy shepten alyp, kózge túspeıtin jerlerge otyrǵyzǵan. «Biz bárimiz ártúrlimiz, biraq teńbiz» degen uranmen ótken is-sharany bul qyzdar asyǵa kútti dep jazady Aıda Kolpakova. «Tańerteń turyp, boıanyp-sylanyp, ádemi kóılekterin kıip, ýaıymdap, tolqyp, konsertke ketken bolatyn, myna jaǵdaı olardyń kóńilderine kirbiń uıalatty. Men ózimdi patrıot dep sanaıtynmyn. Shetelde 13 jyl turǵanda da elim, jerim týraly bir aýyz jaman sóz aıtpaıtynmyn. Sóıtsem, men maqtan tutqan Qazaqstan para bı chempıonatynan alǵashqy altyn jeńip alǵan kishkentaı qyzdardy sahnadan kórsetýge uıalyp, Shabyt ýnıversıtetinde tyǵyp ustady. Bul netken soraqylyq? Netken masqara?» deıdi ashýlana Aıda. «Qazaqstannyń basty qazynasy, baılyǵy – adam» dep taıǵa tańba basqandaı Ata zańda jazylyp tursa da, bılik, ashyǵyn aıtqanda, bılik jaǵympazdary «jaqsy kórinemin, jaǵamyn» degen oı-maqsatpen osyndaı soraqy tirlikke bardy. Eń qyzyǵy, Aqtóbe aqparat ortalyǵy bylaı dep jaýap qatypty: Múmkindigi shekteýli balalar 29 tamyzda ótetin konsertke shaqyrylǵan bolatyn. Konsert bastalmas buryn aýa raıynyń nasharlaýyna baılanysty balalardy ata-analarymen qosa kórshi ǵımaratqa kóshirgen bolatynbyz. Sol jerde olar sahnaǵa shyǵar ýaqytty kútip otyrýy tıis edi. Alaıda konserttik baǵdarlamanyń qysqartylýyna baılanysty balalalar qorytyndy nómirge keshigip shyqty. Balalar men ata-analarǵa belsendilik tanytqandary úshin alǵys aıta otyryp, oryn alǵan jaıt úshin keshirim suraımyz». Bir nárse aqylǵa syımaıdy, Aqtóbe aqparat ortalyǵynyń aıtýy boıynsha, balalar sahnaǵa shyǵypty, al anasy teriske shyǵaryp otyr.

Aıda aqtóbelik bıliktiń keshirim suraýynan keıin taǵy bir jazba jarıalady. «Maǵan eshkimniń keshirim suraǵany qajet emes. Meniń balalarymdy da aıaǵandaryńyzdy qalamaımyn. Aýa raıy buzyldy deıdi... Eshkim shyndyqty aıtqysy kelmeıdi. Árkim óziniń kreslosy úshin qorqyp otyr. Osymen bul áńgime támam bolsynshy. Tek bir-aq nárse ótinip suraımyn: dıskrımınasıaǵa is júzinde jol bermeseńizder! Menen aqtalǵandaı bolyp keshirim suraǵansha múmkindigi shekteýli jandardyń júrip-turýyna, ómir súrýine qolaıly jaǵdaı jasasańyzdar, lıft ornatsańyzdar, baspaldaqtarmen qosa «pandýstar» ornatsańyzdar, men qýanamyn. Aqtóbede ishinde lıftisi bar mektep bolsa, qandaı ǵanıbet bolar edi. Qanshama arbaǵa tańylǵan bala mektepke barýdy, bilim alýdy, eń bastysy barlyq balamen teń bolýdy armandaıdy. Negizi, shyn júrekterińizben qalasańyzdar, atqarar sharýa kóp, ákimıat! Bizdiń balalarǵa qoldaý bildirgen, jazbany oqyp, beıjaı qalmaǵan barshańyzǵa alǵys bildiremin» dep jazady sóz sońynda Aıda.

Aıda ári qaraı ákimıatpen bolsyn, uıymdastyrýshylarmen bolsyn kúresýdi doǵarýdy durys dep sanaǵan sıaqty. Biz de óz kezegimizde uıymdastyrýshylarǵa qońyraý shalyp, qaıtadan keshirim estigenshe, ýaqytty zaıa ketirmeı osyndaı erekshe balalardyń batyl analaryn, ákelerin suhbatqa tartyp, oqyrman nazaryna usynýdy paıdalyraq dep sheshtik. Meıirimdi bolaıyq, zamandastar! Adamdyq qalpymyzdan aınymaıyq!