Qazaqstan men Reseı Baıqońyrdy 2050 jylǵa deıin jaldaý kelisim-shartyna 1994 jyly qol qoıǵany belgili. Máskeý Baıqońyrdy jaldaý aqysy retinde bizge jylyna 115 mıllıon dollar tóleıdi. Dese de jaldaý bar da, jerin jalǵa alyp otyrǵan eldiń zańy men halqynyń talaptaryn nazarǵa alý bar. Baıqońyr jaldaýshylary keıde ózderin Qazaqstandaǵy kishkentaı Reseı sıaqty ustaıtyny jasyryn emes. Onyń ústine zańdar men jalaqy, tólemder arasyndaǵy aıyrmashylyqtar osy aımaq halqynyń turmys-tirshiligine, áleýmettik jaǵdaıyna kádýilgideı áseri bar.
Basqa reseılik mekemeler tárizdi Baıqońyrdyń dárigerleri de Reseı zańymen ómir súrip, Reseı tarıfterimen tólemder tóleıtin. «Osy kezge deıin qoldanystaǵy zańǵa sáıkes Baıqońyr aılaǵynda turatyn Qazaqstan azamattary medısınalyq kómekti tek reseılik medısınalyq uıymdardan Reseı Federasıasynyń zańnamasy boıynsha alyp kelgen bolatyn. Bizdiń azamattarymyzǵa kórsetilip jatqan medısınalyq qyzmet Qazaqstanda qarastyrylǵan tegin medısınalyq kómektiń kepildendirilgen kólemine sáıkes kelmeıtin. Sondyqtan da Baıqońyr qalasynda respýblıkalyq búdjet esebinen Qyzylorda oblystyq medısına ortalyǵynyń fılıaly bolyp tabylatyn emhana salyndy. Ol 2016 jyldyń tamyz aıynan bastap jumys jasap keledi. Alaıda bul emhana búgingi kúnge deıin tolyqqandy medısınalyq járdem kórsete almaı keledi, óıtkeni, bul emhanada tek josparly túrde ǵana medısınalyq kómek kórsete alady». Senattyń jalpy otyrysynda eki el úkimetteriniń arasyndaǵy Reseıdiń «Baıqońyr» keshenin jalǵa alý jaǵdaıynda Baıqońyr ǵarysh aılaǵynyń personalyna, Baıqońyr qalasynyń, Tóretam jáne Aqaı kentteriniń turǵyndaryna medısınalyq qyzmet kórsetý tártibi týraly kelisimge ózgerister engizý týraly hattamany ratıfıkasıalaý barysynda sóz alǵan senator Murat Baqtıaruly osylaı dedi.
Búgingi talqyǵa túsip otyrǵan hattama ratıfıkasıalanǵan jaǵdaıda Baıqońyr aılaǵynda jumys jasaıtyn azamattarymyz ben olardyń otbasyna kórsetiletin kómektiń aýqymy da, sapasy men qoljetimdiligi de artady, - degen senator Úkimettiń jáne tıisti mınıstrliktiń nazaryn ózekti, tez arada sheshimin tabýǵa tıis mynadaı máselege aýdardy.
Densaýlyq saqtaý mınıstriniń 16.09.2015 j. №725 buıryǵy boıynsha alǵashqy medısınalyq-sanıtarlyq kómek kórsetiletin Qyzylorda oblysynyń densaýlyq saqtaý sýbektilerine adam basyna bekitilgen tarıf aıyna 683 teńgeni quraıdy. Júıeli jan basyna shaqqandaǵy normatıv (KPN) boıynsha ambýlatorlyq-emhanalyq kómek kepildik berilgen tegin medısınalyq kómek kólemi aıasynda respýblıkalyq búdjetten beriledi jáne onyń ishinde barlyq komýnaldyq shyǵyndar bar. Alaıda, Baıqońyr qalasynda kórsetiletin komýnaldyq qyzmet Reseı Federasıasynyń bekitken tarıfterimen tólenedi. Komýnaldyq qyzmet quny Qyzylorda oblysynyń tarıfterimen salystyrǵanda birneshe ese qymbat. Mysaly: sýyq sýdyń 1 tekshe metri Qyzylorda oblysynda 95 teńge bolsa, Baıqońyrda 479 teńge – 5 ese qymbat, jylý oblysta 1 Gkal 14,0 myń teńge, Baıqońyrda 56,6 myń teńge – 4 ese, elektr energıasy 1 kvt-i 25,3 teńge bolsa, Baıqońyrda 44 teńge – 1,7 ese qymbat, kanalızasıa 1 tekshe metri 159,6 teńge bolsa, Baıqońyrda 574 teńge – 3 ese qymbat. Nátıjesinde 2017 jyly Baıqońyr qalasyndaǵy emhana 68 mıllıon teńge shyǵynǵa batsa, osy jyldyń qańtar-aqpan aılarynda 30 mıllıon shyǵynmen aıaqtady, dedi senator Murat Baqtıaruly.
Sondaı-aq, Senat depýtaty densaýlyq mınıstrine Baıqońyr qalasynyń erekshe statýsyn eskere otyryp, adam basyna shaqqandaǵy normatıvke tıis koeffısent qosýdyń joldaryn jáne osy emhanada jumys jasaıtyn qyzmetkerlerdiń jalaqysyna ekologıalyq apat aımaǵyna beriletin qosymsha aqsha bólýdiń joldaryn qarastyrýdy da amanattady.
Ádilbek Qaba
