Búgin Ortalyq komýnıkasıalar qyzmetinde ótken baspasóz máslıhaty barysynda ishki ister mınıstri Qalmuhanbet Qasymov mánerlep syrǵanaýshy Denıs Tenniń ólimine qatysty tyń derektermen bólisti.
«Naqty dálelder sotta naqtylanady. Denıs Tenge shabýyl jasaǵandardyń ekeýi de Almatyǵa kóship kelgender. Ekeýi de úsh márte sottalǵandar. Olar alǵashynda kólik jýý ortalyǵynda jumys istedi, keıin áınek urlaýmen aınalysa bastady. Dál sol kúnderi aqshadan qatty qysylypty. Páterge tóleý úshin kerek bolǵan eken aqsha. Qujatsyz, eshteńesiz qalaǵa keledi de, bir páterge ornalasady. Basqa elderde mundaıǵa jol bermeıdi. Ondaı qylmyskerlerge qalanyń ózi jaǵdaı jasap otyr. Qalaǵa keldi, bir páterge ornalasty», - dep túsindirdi İİM basshysy. Sózine qaraǵanda, mundaı qylmystardyń jıi oryn alýyna qala turǵyndarynyń ózderi kináli. Ári qaraı mınıstr kúdiktilerdiń qylmystaryn qalaı júzege asyrǵandaryn aıtyp berdi.
«Tań ata kóshege shyǵyp, qylmystaryn júzege asyratyn nysan izdeýge kiristi. Denıs Tenniń kóliginiń mańyn aınalshyqtap júrdi. Qymbat kólik, terezeleri bar, eshqandaı jazýy joq. Qazir kóbi saqtanyp, nómirlerin qaldyryp ketedi. Sóıtip álgi ekeýi terezeni kesýdi bastaıdy. Dál sol ýaqytta Denıs Shyǵyp qalady. Ol sportshy ǵoı, qylmyskerlerdi birden ustady. Kúdiktiniń biri qashyp úlgermedi, Denıstiń qatty qysyp ustaǵany sonsha tipti sportshyǵa kúshi jetpedi. Sol sátte ekinshisi seriktesin qutqaryp qalý úshin Denıske pyshaq suǵady. Óltirgisi keldi me, joq pa, sotta anyqtalady. Jaǵdaı osyndaı», - dedi.
Al Denıske shabýyl jasalǵan ýaqytta Qasymov Aqtaýda bolǵan eken.
«Maǵan habarlasyp, qylmys jaıynda aıtty. Bárin baqylaýda ustadyq. Qylmyskerlerdi anyqtap, birinshisin ustadyq. Ekinshisin ustaý qıynǵa soqty, ol qashyp júrdi. Biz de barymyzdy salyp izdeýge kiristik, aqyry ol da ustaldy. Úsh túnimizdi uıqysyz ótkizdik», - dedi Qasymov.
Aıta keteıik, 2018 jyldyń 19 shildesinde Almatynyń dál ortalyǵynda qazaqstandyq mánerler syrǵanaýshy Denıs Tenge shabýyl jasaldy. Kóp qan joǵaltqan sportshy sol kúni aýrýhanada jan tapsyrdy. «Denısti óltirdi» degen eki kúdikti – Nuraly Qıasov pen Arman Qudaıbergenov tutqyndaldy.
