Aqtóbelik sheneýnikter oqýshylarǵa álippe taýyp bere almaı álekke túsip jatyr. Bilim bólimindegiler birinshi synypqa baratyn oqýshynyń sanynan shatasyp, baspahanaǵa durys tapsyrys bermegen. Sonyń saldarynan mektep tabaldyryǵyn endi attaǵan balalardyń jartysynda bir aıdan beri oqýlyq joq dep habarlaıdy Qamshy.kz aqparat agenttigi KTK telearnasynyń deregine súıenip.
«Qala shetindegi mekteptiń birinshi synyp oqýshylary bir aıdan beri áli álippeniń betin ashpaǵan. Tegin taratylatyn oqýlyq bularǵa jetpeı qalypty. Matematıka men saýat ashý oqýlyǵy da joq», - deıdi turǵyn Gúlbahram Elbaeva.
Oqýlyqtyń joqtyǵynan muǵalimder de qınalyp ketken. Ótken sabaǵynyń tapsyrmasyn sýretke túsirip, ata-analarǵa uıaly telefon arqyly tartýǵa májbúr. Odan qaldy kóshirme jasaıdy.
Qazir tek bir mekteptiń emes, qaladaǵy birinshi synypqa baratyn myń jarym oqýshynyń oqýlyǵy joq. Sheneýnikter bala sanynan «shatastyq» dep otyr. Óıtkeni, Bilim mınıstrligi bıyl alty jasqa tolmaǵan búldirshinderge de sabaqqa kelýge ruqsat bergen. Sondyqtan mektep tabaldyryǵyn jańa attaǵan shákirtterdiń sany kóbeıip, kitap jetpeı qalypty.
«Biz toǵyz myńdaı bala alǵash partaǵa otyrady dep josparlaǵan edik. Endi Bilim mınıstrliginiń buıryǵynan keıin taǵy myń jarym bala qosyldy. Sol sebepti kitap jetpeı qaldy», - deıdi Bilim bólimi basshysynyń orynbasary Dına Haletova.
Birinshi synyp oqýshylaryna jetpeı qalǵan oqýlyqqa jergilikti búdjetten shuǵyl túrde 100 mıllıon teńge bólinipti. Biraq ol aqshaǵa qashan kitap jetkizetini ázir belgisiz. Al tamyz máslıhatynda bilim salasyna jaýapty sheneýnikter aımaqtaǵy barlyq oqýshyny tegin oqýlyqpen tolyq qamtydyq degen edi.
