Ótken aptada Aqmola oblysynda Astana qalasyna jaqyn jerde elimizdegi iri, jylyna 50 myń tonna qus etin óndirý qýaty bar Makınsk qus fabrıkasynyń birinshi kezegi iske qosyldy. Joba qurylysyna arnalǵan qarajattyń jartysyna jýyǵyn «Qazaqstannyń Damý banki» AQ bólip otyr.
Birinshi kezeńde qus fabrıkasynyń óndiristik qýattylyǵy jylyna 25 myń tonnaǵa, ekinshi kezeńde 50 myń tonnaǵa jetedi. Qus fabrıkasy Aqmola oblysynyń Bulandy aýdanynyń Baısýat aýylynda, aýdan ortalyǵy – Makınsk qalasyna jaqyn ornalasqan.
«Ekinshi kezektegi 50 myń tonnalyq óndiris elimizdegi taýyq etine degen suranystyń 15%-yn qamtamasyz etedi. Bul aıtarlyqtaı kólem. Kompanıa óz ónimin joǵary deńgeıde, satyp, tarata alady. Ónimniń kóp bóligi Óskemen qus fabrıkasy sekildi tońazytylǵan taýyq eti túrinde satylatyndyqtan, ımporttyq muzdatylǵan qus etimen básekeles bola alady. Sondyqtan ınvestor retinde biz jobanyń únemdiligine óte senimdimiz», - dedi QDB tóraǵasy Bolat Jámishev qus fabrıkasynyń ashylý saltanatynda.
Quny 33,5 mlrd teńge jobaǵa qajet ınvestısıanyń 50%-dan astamyn QDB enshiles uıymy – «Báıterek» holdıńi (16,1 mlrd teńge) jáne «Qazyna Kapıtal Menedjment» AQ (QKM), qalǵan kólemin jobanyń bastamashysy «Aitas KZ» AQ bólip otyr. Eýropalyq Qaıta qurý jáne damý banki (EQDB) «Aitas KZ» AQ kapıtalyna qatysý arqyly jobaǵa ınvestısıa quıdy.
Makınsk qus fabrıkasy qurylysynyń jalpy quny, ekinshi kezekti qosqanda, 45,6 mlrd teńgeni quraıdy.
Alǵashqy ónim naryqqa bıylǵy qarashada túsedi dep josparlanýda.
«Aitas KZ» quryltaıshysy Serik Tolyqbaevtyń aıtýynsha, kompanıa elimizdiń soltústigin: Petropavl, Kókshetaý, Qostanaıdy qus etimen qamtamasyz etedi. Kompanıanyń josparynda Astana da bar.
«Biz ol jaqtan (Astanadan – avt.) Óskemen qus fabrıkasynyń ónimderin alyp shyǵamyz, ony birtindep Makınsk qus fabrıkasynyń ónimderimen aýystyramyz. Munyń bári «Kýs-Kýs» brendi arqyly bolady», - dedi S.Tolyqbaev.
Elorda turǵyndary Makınsk qus fabrıkasynyń ónimderin Jańa jyldan keıin satyp ala alady.
Qus fabrıkasynyń ashylý saltanatynda sondaı-aq QDB táýelsiz dırektory qatysty. Antonıo Somma bul jobany júzege asyrý bank úshin «negizgi munaı gaz óndirýshi saladan bólek, ekonomıkany ártaraptandyrýdy qoldaý mısıasyn júzege asyrýdyń tamasha mysaly» bolyp tabylatynyn atap ótti.
«Bul jobalar ımportty almastyrýǵa múmkindik beredi. Qosylǵan qun tizbeginiń aýystyrylýy, joǵary qosylǵan qun, uzaqmerzimdi turaqty jumyspen qamtý, ımportty almastyrý –bul ártaraptandyrýdyń halyqaralyq standarty jáne bul ádisti EYDU Qazaqstan ekonomıkasynyń damýyn nyǵaıtý úshin usynyp otyr», - dedi A.Somma, QDB qorjynynda osyndaı jobalardyń kóbirek bolýyna tilektestik bildire kelip.
