Aty bar da, zaty joq! Túrkistan oblysynda ata-anasynan aıyrylǵan tul jetim azamattyǵyn dáleldeı almaı júr. 24 jastaǵy jigit turaqty mekenjaıy bolmaǵandyqtan, mektepke barmapty. Saldarynan kitap oqymaq túgili, hat tanymaıdy. Tipti, óziniń aty-jónin de jaza almaıdy eken. 18 jyl boıy árkimniń qolastynda jumys istep, dalada túnep kelgen. Ómirden óz ornyn taba almaı júrgen keıipker týraly Eýrazıa birinshi arnasy habarlaıdy.

Yrysbek Jańabekov – Túrkıanyń týmasy. Ákesinen bes, al, anasynan alty jasynda aıyrylǵan ol áldekimderdiń yqpalymen osydan on segiz jyl buryn Qazaqstanǵa kelipti.  Sodan beri Jetisaıda turyp jatyr. Kezinde qujattary bolmaǵandyqtan, mektepke de barmapty. Árip tanymaǵandyqtan, aty-jónin de qaǵazǵa túsire almaıdy.

Yrysbek qujatsyz júrgendikten talaı márte óz quqyǵyn qorǵaı almaı qor bolǵanyn aıtady. Tek, jýyrda ǵana jergilikti zańger Ámirhan Amankeldıevtiń kómegimen tólqujatqa ıe bolypty. Sóıtip, birden turǵyn úı kezegine ótinish tapsyrǵan. Oǵan deıin dalada túneýge májbúr.

«Qazir bir úıde turǵanmyn, ol satylaıyn dep jatyr ǵoı. Sál oqyǵanmyn, joǵary oqý ornyna túsýim kerek qoı. Ary qaraı jumys isteýim kerek» - deıdi Jetisaı qalasynyń turǵyny Yrysbek Jańabekov.

Yrysbek  ómirinde dárigerdiń qabyldaýynda bolmaǵanyn aıtady. Sonyń áseri bolsa kerek, qazir densaýlyǵy azdap syr berip júr eken. Basy aýyryp, baltyry syzdasa, ózinshe em-dom jasaýǵa daǵdylanyp alypty. Onyń jaǵdaıynan habardar bolǵan aýdan ákimdigi jaýapty tulǵalar jýyrda medısınalyq tekserýden ótkizip, qysqa merzimdi kýrstarǵa jiberemiz dep otyr. Árip tanyǵan soń, aqyly qoǵamdyq jumysqa ornalastyrmaq.

«Bul jigit bizge kelip, eger medısına jaǵynan tekserilip, aqyl-esiniń durystyǵy, jumysqa qabiletti dep tanylyp jatsa, biz bul jigitke memleket tarapynan qandaı kómek kórsetiledi, sonyń bárin kórsetýge daıynbyz. Ol,  birinshi - oqytý, ekinshi  - jumyspen qamtý» - deıdi Jetisaı aýdany ákiminiń keńesshisi Aıdar Seıdazym.

Yrysbek osy kúni árkimge jaldanyp, eńbek etedi. Tapqan tabysyn kúndelikti tamaǵyna jumsaıdy. Kámelettik jasqa tolǵandyqtan, memleket tarapynan oǵan eshqandaı járdemaqy taǵaıyndalmaıdy eken. Eger densaýlyǵynda qandaı da bir kinárat tabylatyn bolsa, onda sóz basqa deıdi mamandar.

«Basym aýyrady, qulap qala beremin degen áńgimelerdi aıtyp otyr. Al eger rasynda basy aýyryp, qulap qala beretin jaıy bolatyn bolsa, bul kisi ortalyq emhanaǵa baryp, sol jerden dárigerlerge kórinip, aýdandyq VKK komısıa bar ǵoı, sol komısıadan ótip, ıá, mynandaı aýrýy bar dep anyqtaıtyn bolsa, onda múgedektik taǵaıyndalady» - deıdi Jetisaı aýdandyq halyqty jumyspen qamtý jáne áleýmettik baǵdarlamalar bóliminiń basshysy Ádilhan Ábjanov.

Ómirden qansha teperish kórse de 24 jastaǵy jigit esh jasymaǵan. Armansyz da emes.  Tezdetip bilim alyp, jaqsy bir maman bolýdy maqsat etip otyr. Otbasyly bolý da oıynda bar.