Búgin álem jankúıerleri taǵatsyzdana kútken daǵystandyq Habıb Nurmaǵamedov pen Konor MakGregordyń jekpe-jegi Las-Vegastaǵy T-Mobile arenasynda ótti dep habarlaıdy Qamshy.kz aqparat agenttigi. Bul jekpe-jekti «QAZSPORT» telearnasy tikeleı efır arqyly kórsetti. Ǵasyr jekpe-jeginde Konor MakGregor Habıb Nurmaǵamedovke ese jiberdi.
Alǵashqy raýndttyń ózin emosıasyz qaraý múmkin bolmady. Eki sportshy da jaqsy qorǵana bildi. Alǵashqy raýndta Habıbtiń soqqysyna qaraǵanda Konordyń soqqysy basymyraq boldy. Ekinshi raýndta Habıb kútpegen jerden óziniń joıqyn soqqysyn jasady. Múndaı joıqyn soqqyny jankúıerler de, Konor da kútpegen edi. Ekinshi raýndta Habıb óz ýádesin oryndaǵandaı boldy. Sebebi bul Konor úshin eń uzaq raýnd boldy. Habıb Nurmaǵamedov ekinshi raýndta 50-den asa soqqy jasap úlgerdi. Úshinshi raýndta eki sportshy da ara qashyqtyqqa mán berip, qorǵanysty kúsheıtti. Konor sol qolymen soqqy jasaǵysy keldi. Alaıda Habıb Konorǵa múmkindik bermedi. Jankúıerler bul jekpe-jektiń 3 raýndta nokaýtpen aıaqtalýyn kútken edi. Tórtinshi jekpe-jekte Habıb Nurmagamedov te, Konor MakGregor da sharshaı bastady. Habıb Nurmagamedov tórtinshi raýndta Konordy qylǵyndyryp jeńiske jetti. Alaıda MakGregordyń jankúıerleri shý shyǵarǵandyqtan uıymdastyrýshylar Habıbke UFC beldigin tabystamady.
Daǵystandyq sportshy osyǵan deıin 26 jekpe-jek ótkizip, barlyǵynda jeńiske jetken. Al Konor MakGregor 2015-2017 jyldar aralyǵynda 24 jekpe-jek ótkizip, 21-inde jeńiske jetken. Habıb Nurmagamedov 2014 jyly Konor MakGregordyń jekpe-jegine tánti bolyp, jankúıeri bolǵanyn aıta ketý kerek. Alaıda jeńil salmaqtaǵy chempıon pen onyń kýmıriniń arasynda daý týyndaıdy. Daýdyń basy Habıbtiń ázilinen bastalǵan sekildi. Byltyr Konor óziniń áıeli aıaǵy aýyr bolǵasyn, 1 jyldyq demalys alady. Sol kezde Habıb «Konordyń áıeli emes, ózi júkti bolyp qalǵan sıaqty. Qysqasy, Konor dekrette» dep onyń shamyna tıetin málimdeme jasady. Keıin bul sózdi estip ashýlanǵan Konor MakGregor Habıbtiń ákesin balaǵattaıdy. Bul daý tóbeleske ulasa jazdap, búgingi jekpe-jektiń kórermenderdiń qyzyǵýshylyǵyn odan saıyn arttyrmasa kemitken joq.
Búgingi kezdesýden buryn Habıb pen Konor Makgregor qatysqan 2 márte pres-konferensıa ótken bolatyn. Alǵashqy pres-konferensıa kezinde Konor óziniń ıtalıandyq vıskıin alyp kelip, Habıbke usynǵan. Alaıda Habıb ózin sabyrly ustap "men ishpeımin", - dep jaýap berdi.
Konor Makgregor Habıbti ońaı jeńetinin aıtyp, óziniń jankúıerlerine bul jekpe-jekten keıin Habıb aýrýhanadan bir-aq shyǵady dep ýáde bergen bolatyn. Al Habıb óz kezeginde Konorǵa bul jekpe-jektiń uzaqqa sozylatynyn aıtyp, ózin unatpaǵan sheteldik jankúıerlerge "áli-aq meni moıyndaıtyn bolasyńdar", -dep ýáde berdi.
Al ekinshi pres-konferensıa kezinde MakGregor keshigip keldi. Konor muny ádeıi istedi me álde shynymen keptelistiń sebebinen keshikti me belgisiz. Habıb bolsa Konor MakGregordyń bul is-áreketin jankúıerlerdi, jýrnalıserdi syılamaǵandyq dep baǵalady. Keıin jýrnalıser qoıǵan saýaldarǵa jaýap berip, pres-konferensıadan ketip qaldy.
MakGregor jekpe-jek kezinde Habıbtiń óligi ǵana shyǵatynyn aıtqan bolatyn. 2015-2017 jyldar aralyǵynda qarsylas shaq keltirmeı júrgen edi. Keıin erejesiz jekpe-jekten ketip, kásipqoı boksshy Maıvezermen qolǵap túıistirgen bolatyn. Maıvezerdi mensinbegen MakGregor bul jekpe-jekte qarsylasyna ese jibergen bolatyn.
Habıb Nurmaǵamedov óziniń suqbattarynyń birinde Konor MakGregordyń ishimdik ishetinin synaǵan bolatyn. Ol "Konor ishimdikke qumar. Jekpe-jekkezinde maǵan qalaı qarsy turaıyn dep tur onysyn túsinbedim. Men ony baǵalamaı turǵan joqpyn. Ol sol qolymne joıqyn soqqy jasaıdy. Men ony bilemin. Alaıda ol sharshaǵan sátte berile salady. Al osyǵan deıin bolǵan jaıttar týraly jekpe-jek kezinde jaqsylap sóılesetin bolamyz",- degen bolatyn.
