Sheraǵa aıtqan juldyzy bıik Jýaly sońǵy kúnderi túnerip, álsin-álsin aspan kózi tamshylap, Uly jazýshynyń janyndaı jaqsy kóretin týǵan jeri bir qaıǵyly habardyń taraıtynyn sezgendeı túnergen qabaǵyn ashpady. Sheraǵam aıtatyn Táńirtaýdyń aq basyn qoıý sur bult torlap, qyzdyń qos burymyna teńegen Aqsaı men Kóksaı laı sýǵa toldy. Shaqpaqtyń jeli kúsheıdi. Sol Shaqpaqtyń jeli Kókemdi kók aspanǵa kóterip áketkendeı.

Sheraǵańnyń Shaqpaq jeline aıtqan nazy oıyma oraldy: «Aı, Shaqpaq jel, Shaqpaq jel! Kimdi ushyraryńdy bilmeısiń-aý... Aramdardan, ádiletsiz haıýandardan tazartsań edi...». Qansha dúleı jel bolsada tazarta almaı keledi. Endi jamandyqtan tazartar Kókemniń aýzynan shyqqan qanatty sózderi, kitaptaryndaǵy kisilik qaǵıdattary talyp súıgen qazaq halqynyń uzaq ýaqyt rýhyn kóterip，táýelsizdigimizdiń baıandy bolýyna bastaıtyny anyq.

Halqynan únemi alasa kópshiligimizden bıik Kókem Allanyń qalaýymen Kók Táńirine kóterildi. Endi topyraǵy torqa bolǵyr, qaıran Kókem myna ómirdiń jaqsysy men jamanyn Kók Táńiriniń mamyǵynan únsiz sholady. Bolmysy bólek，aqyly zerek, sózi saýytty buzar jebeniń saıgezindeı, qazaqtyń aı múıizdi asyl azamatymen 1999 jyldyń Parlament saılaýynda senimdi ókili retinde janynda júrip, eki aı birge ótkizgen kún-túnimdi ómirimniń eń baqytty kúnderine balaımyn. Unatpaıtyn adamyn jamandamaıtyn kisilikti Kisini ómirimde tuńǵysh ret sol kezde kórdim. Esesine qımasy bolsa da aqıqatyna kelgende jalyndap turatyn otty sózimen betinen qaıtaryp tastaıtyn qaısar，qaıtpas minezin bildim. Halqynyń baqyty úshin mansabyn da, ataq -dańqyn da aıyrbastaı salatyn Atpal Azamatty tanydym. Sherhan Kókemniń shekpenin, almas qylyshtaı ýytty da, otty sózin, keýdesin eshkimge bastyrmaıtyn ór minezin，jibekteı maıda jymıysyn, ádemi qaljyńdaryn，eljirep turatyn júregi men eli úshin janyn pıda etýge daıyn tulǵasyn sarǵaıa saǵynamyz. Saǵynyshymyz Qazaqstan Halyq jazýshysy Sherhan Murtaza dertke shaldyqqan kúninen sarǵaıa bastaǵanyn da jasyra almaımyz. Qaıtemiz endi, kókke kóterilgen Kókemniń aldynan Allanynyń nury shalqysyn！