Eger ústerińizdegi sheteldik kıimdi sheship alsaq, tyr jalańash qalasyńdar! Osy kúnge deıin otandyq óndiriske nemquraıly qarap kelgen Úkimettiń jumysyn Prezıdent osylaı synady jýyrdaǵy Joldaýda. Elbasynyń sózine kóz jetkizý úshin bizdiń tilshiler mınıstrler kabınetiniń músheleriniń qandaı kostúm kıip júrgenin zerttep kórdi. Bul týraly Eýrazıa birinshi arnasy habarlaıdy.
Et-sút ónimderin alarda otandyq taýardy izdeımiz. Qoldyń súti, óz jerimizde jaıylǵan maldyń etin jegimiz keledi. Al kıim-keshek, turmystyq tehnıkaǵa kelgende sheteldiń zatyn alýǵa, tanymal brendke qumarmyz.
«Sizderdiń ústerińizge kıgen sheteldik kostúmderińizdi sheship alsaq, jalańash qalasyńdar. Bizdiń elimizde de sapaly kıim shyǵara alady. Men ózim tek otandyq ónimdi qoldanamyn. Sapaly ári on ese arzan. Ózimizdi qoldaý kerek!» - dedi QR Prezıdenti Nursultan Nazarbaev.
Eger joǵarydan buıryq kelip, sheneýnikterdi sheshindirip alatyn bolsaq, Erlan Saǵadıevten basqasy jalańash qalýy múmkin. Bilim salasyndaǵy reformalarmen basy qatyp júrse de bas muǵalim otandyq kostúmdi kıedi eken.
«Mine, otandyq kostúm. QLP. Almatyda jasalǵan» - deıdi QR Bilim jáne ǵylym mınıstri Erlan Saǵadıev.
Otandyq ónimdi qoldaýǵa bólingen qarjy, el ekonomıkasynyń ahýalyn Erbolat Dosaevten artyq eshkim bilmeıtin shyǵar. Qansha jyldan beri Úkimettiń aınalasynda júr. Biraq garderobynda birde bir otandyq kıim joq eken.
«Import, áli kórgen joqpyn» - dedi QR Premer-Mınıstriniń orynbasary Erbolat Dosaev.
«Proızvodstvo nashe» - dedi QR Premer-Mınıstriniń orynbasary Asqar Jumaǵalıev.
«Keıbir kezde elden alamyz, keıbirde shetelge komandırovkaǵa barǵanda alamyz. Endi Elbasy aıtqannan keıin bizdiń óndirýshilerge kóńil bóle bastaımyz» - deıdi Aqparat jáne komýnıkasıalar mınıstri Dáýren Abaev.
«Men osy jerde tigemin Astanada. Imperatorskıı dom bar ǵoı, sol jerde» - deıdi Mádenıet jáne sport mınıstri Arystanbek Muhamedıuly.
Nursultan Maǵzomov bıznes salasy boıynsha shetelde bilimin shyńdapty. Jat jerde júrip ózge jurttyń kıim úlgisindegi talǵamyn baıqaǵan. Elge kelgen soń dál sondaı otandyq brend taýaryn shyǵarýǵa bel býǵan. Qazir Qazaqstan boıynsha 10 býtıgi bar. Tipti Reseıden de ashypty.
«Máskeýden kelgen kezde ımporttyq kostúmderdiń qymbat ekenin baıqadyq. Al arzan baǵadaǵy kıim unamady. Sodan soń osyny nege ózimiz tigip almaımyz degen oı keldi. Basynda on shaqtysyn tigip kıip alǵan kezde qyzyqqandar, suraı bastaǵandar kóbeıdi» - deıdi kásipker Nursultan Maǵzomov.
Solardyń birine biz de baryp kórdik. Kostúmderdiń baǵasy 75 myń teńgeden bastalady. Sebebi, elde tigilgenimen, materıal syrttan keledi. Myna taýardyń bári otandyq ónim eken.
Mine, kıinip shyqtym. Ústimdeginiń bári otandyq ónim. Myna kostúm 99 myń, kóılek 11 myń. Belbeý 12 myń, galstýk 9 myńnan bastalady. Sonda tutas kıinip shyǵý úshin 130 myń teńgeden asa qarjy ketedi. Eger aıaq kıim alsańyz, týflıler 37 myń teńdegen tur. Esepteı berińiz.
