Naýryzbaı aýdanynyń Aqjar men Quramys yqshamaýdandaryndaǵy kósheler taqtaıdaı tegisteledi. Qazir jergilikti bılik ókilderi atalǵan eldimekenderdegi joldardy jóndeýge tapsyrys beripti. Qujat maquldanyp, qarjy bólinse qarqyndy qurylys keler jyly bastalmaq. Al bıyl qalanyń kenje aýdanynda bas-aıaǵy 42 kóshege asfal tóselip, 16 shaqyrym aryq jelisi jasaldy.

Bul Aqjar jáne Quramys yqshamaýdandardaǵy turǵyndar úshin rasymen de qýanyshty habar. Óıtkeni, mundaǵy halyq jol azabyn uzaq ýaqyttan beri tartyp keledi. Qazir tas joldardy tegisteýmen aınalysqan jumysshylar Berdibaev kóshesin asfálttap bitirýge taıady.

«Bul yqshamaýdanda turǵanyma 40 jyldan asty. Bizde buǵan deıin múldem asfált tóselmegen edi, júrginshiler joly da joq bolatyn. Mine, bıyl kóp jyl armandaǵan jolymyz jóndeldi. Óte qýanyshtymyz. Endi kóshemizge jaryq tússe dep tilep otyrmyz», - deıdi Naýryzbaı aýdanynyń turǵyny Dmıtrıı Dreev.

Naýryzbaı aýdany alǵash qurylǵanda ınjenerlik jeli ataýlydan jurdaı bolǵan. Tek 47 kóshede jaryq bolsa, búginde bul san 80-ge jetipti. Bıyl aýdannyń tas qarańǵy 7 kóshesine uzyndyǵy 8,5 shaqyrym jaryq jelisi tartyldy. Al, eń kúrdeli problema – aryqtar jelisi bolyp tur.  

«Jalpy, aýdan qurylǵan kezde tek 24 kóshede aryq júıesi qarastyrylǵan bolsa, bul kórsetkish búgingi kúnde 54 shaqyrymǵa jetip otyr. Bıylǵa 16 shaqyrym jol jóndeý jumystary jasalǵan kezde, solarmen birge aryq júıeleri de salyndy. Kelesi jylǵa taǵy 19 shaqyrym aryq jóndeýge tapsyrys berildi», – deıdi Almaty qalasy naýryzbaı aýdany ákimi orynbasarynyń mindetin atqarýshy Asylhan Orynbekov.

Kóktem-kúzde tolarsaqtan sý keship, úı aýlalary kólkigen sýǵa tolatyn kósheniń biri Nájimedınov bolatyn. Mundaǵy turǵyndar talaı jyldan beri taýdan aqqan laı-sýmen alysyp álek bolǵan. Osy jazda kóshege asfált tóselip, mańyna tereń aryq jasaldy. Mamandar endi munda laı-batpaq pen, tasqynnan keler qaýip joq deıdi.

«Buryn jańbyr jaýǵanda sý aryqqa syımaı tasyp, kósheniń bárin sý alyp ketetin. Kólikterdiń júrýi problemaǵa aınalatyn», - deıdi Naýryzbaı aýdanynyń turǵyny Talǵat Moldabekov.

«Jumystan kelgen ýaqytymda kúıeýim kútip alatyn. Jeńil kólik júre almaı, traktormen alyp ketetin kúnder de bolǵan.  Taýdan aqqan sý joldy shaıyp ketetin. Endi qazir aryq túskeli jatqanyn estip qýanyp otyrmyz», - deıdi Aqmaral Eleýsizova esimdi aýdan turǵyny.

Aýdanda kóp qabatty úı kóp bolmasa da ondaǵy aýlalardyń basym bóligi kúrdeli jóndeýden ótken. Bıyl 6 aýla kóriktendirilip, jergilikti turǵyndarǵa jaıly etildi. Oıyn alańdary jasalyp, jaryq shamdary qoıyldy. Asfált jabyndysy tóseldi. Al, 2019 jyly 20 aýlany kúrdeli jóndeýge tapsyrys berilipti.