Almatyda búdjetten únemdelgen 529 mıllıard teńge áleýmettik salaǵa jumsalatyn boldy.

Búgin qalalyq máslıhat depýtattary bıylǵy búdjetti qaıta naqtylady. Únemdelgen qarajat esebinen joldar jóndelip, aryq jelileri jańartylady.  Ásirese, sý deńgeıi jıi kóteriletin aýmaqtarǵa basymdyq berilip, uzyndyǵy 49 shaqyrymnan astam aryq jelilerin jóndeý kózdelýde. Oǵan 100 mln teńge bólinbek.

Al qarjynyń 2 mlrd teńgeden astamy kólik-jol ınfraqurylymyn jetildirýge baǵyttalady. Bul qarjyǵa tas joldaǵy qaýipsizdikti qamtamasyz etý úshin jol belgileri jasalmaq. Sondaı-aq, Shuǵyla yqshamaýdanyndaǵy kósheler tegisteledi. Ári shahardyń 8 aýdanyndaǵy joldarǵa aǵymdaǵy jóndeý jumystary júrgiziledi. Qala shetindegi Qurylysshy, Ójet, Aqbulaq jáne Qaırat sıaqty yqshamaýdandardyń turǵyndaryn aýyz sýmen qamtamasyz etip, káriz jelilerin salý úshin taǵy 1 mlrd teńge jumsalady.

«Abattandyrýǵa 830,7 mln teńge bólinedi. Onyń ishinde 39 jerasty jaıaý júrginshiler jolyn kútip ustaýǵa 57,7 mln teńge baǵyttalǵan. 2019 jyly aýlalardy abattandyrý boıynsha jumystardy jalǵastyrý úshin 90 mln teńgeden astam qarajat 220 aýlany kúrdeli jóndeýden ótkizýdiń jobalyq-smetalyq qujattamasyn ázirleýge bólinetin bolady. Sondaı-aq, aǵymdaǵy jyly Jetisý aýdanynda aýlalardy kúrdeli jóndeýden ótkizý boıynsha 340 mln teńgeniń jumysy júrgiziledi», – dedi Almaty qalasy Ekonomıka jáne búdjettik josparlaý basqarmasynyń basshysy İlıas Óserov.

Únemdelgen qarajattyń 2,5 mlrd teńgeden astamy áleýmettik salaǵa baǵyttalmaq. Iaǵnı, az qamtylǵan otbasylarǵa qoldaý kórsetilip, múmkindigi shekteýli jandarǵa qosymsha kreslo-arbalar satyp alynady. Aýtızmmen aýyratyn balalarǵa da kóńil bólinip, olardy taý shańǵysymen syrǵanaý negizderinde oqytý josparlanýda. Al qarjynyń 71 mln teńgesi «Rýhanı jańǵyrý» baǵdarlamasy aıasynda aǵylshyn tilindegi oqýlyqtardy qazaq tiline aýdarýǵa jumsalady.

«1-shi qyrkúıekten bastap oqýshylar quramynyń shamamen 13 myń balaǵa deıin kóbeıýine baılanysty oqytýshylardyń eńbekaqysyn tóleýge 316,5 mln teńge jumsalady. 279 mln teńge kolejderdegi oqýshylardyń stıpendıalaryna jáne tamaqtaryna, sondaı-aq jańa stýdentter qabyldaýǵa bólindi», – dedi İlıas Óserov