Dástúrli «Almaty týr» velosherýi ońtústik astanada osymen 6-shy ret ótkizilgeli otyr. Oǵan 15 memlekettiń eń úzdik degen veloshabandozdar qatysady. Aýqymdy sporttyq shara aldaǵy demalys kúnderi ótedi dep josparlanýda. Osynaý dodaǵa oraı, senbi jáne jeksenbi kúni Almatynyń ortalyq kósheleri jabylýy múmkin.
Atap aıtar bolsaq, velosherýdiń alǵashqy kúni, ıaǵnı 29 qyrkúıekte Tóle bı, Baızaqov, Sátbaev jáne Jeltoqsan kósheleri, sonymen qatar, Dostyq, Nazarbaev, ál-Farabı jáne Abaı dańǵyldary jabylady.
Al 30 qyrkúıekte velosherý Shyǵys aınalma avtokólik jolynan bastalyp, Ál-Farabı dańǵylymen jalǵasady. Naqtylar bolsaq, Tuńǵysh Prezıdent saıabaǵynan Dostyq dańǵylyna deıin, odan ári Medeý muz aıdynyna qaraı ulasady. Sporttyq shara 11:00-den 16:00-ge deıin jalǵasady.
Aıta keteıik, ótken jyly «Almaty týrynyń» statýsy ekikúndik bolyp ózgergen bolatyn. Bul Ortalyq Azıadaǵy eń iri velododa bolǵaly tur deıdi uıymdastyrýshylar. Baıraqty báseke 60 elde tikeleı efır arqyly kórsetiledi.
«Tek qazaqstandyq emes, álemge belgili telearnalar da túsiredi, olardyń qatarynda Eurosport arnasy bar. Ol arnadan 30-dan astam eldiń turǵyndary tamashalaıdy. Qazaqstannyń sport naryǵy sheteldik áriptesterimizdi qyzyqtyryp otyr, sol úshin olar byltyr da bizge jaqsy jarnama jasaǵan bolatyn», - deıdi Qazaqstannyń velosıped sporty federasıasy vıse-prezıdenti Amanbek Kýlchıkov.
Demalys kúnderi Almatyda tek velododa emes, sonymen qatar, jyl saıynǵy Fan Run formatyndaǵy áıelderge arnalǵan marafon ótedi. Qatysýshylar erekshe obrazben shyǵyp, «Atakent» kórme zalynan tańǵy 9-da júgirýdi bastaıdy.
«Bıylǵy jyly 350-den asa qatysýshy 8 shaqyrymdy eńsergennen keıin arnaıy medal men gúlderge ıe bolady. Sonymen qatar, áıelder jarysqa erekshe kıimmen qatysady. Iaǵnı, sport ári densaýlyqqa paıdaly, ári kóńil-kúıdi kóteretindeı bolýy kerek dep sheshtik. Olar Atakent parkin 2 aınalym jasap júgiredi. Bul kúni júgirýden bólek sahnada kóńildi oıyn-saýyq baǵdarlamasy bolady», - deıdi jarysty uıymdastyrýshy Quralaı Ermenbaeva.
Sondaı-aq, ortalyq mádenıet jáne demalys saıabaǵynda tańerteńgi 10-nan bastap kóshe óneriniń festıvali uıymdastyrylmaq. Onda turǵyndarán, bı, aıtyp, fýtbol alańdarynda dop tebe alady.
