Almatyda «Ermek Serkebaevtyń dáýiri» atty mýltımedıalyq kórme ashyldy. Kórmege sol dáýirdiń jaýharyna aınalǵan tulǵalardyń eńbekteri men beıne jazbalary qoıylǵan. Tipti, esh jerde jarıa bolmaǵan dúnıeler ánshiniń jeke qorynan arnaıy alynyp qoıylǵan.
Atalmysh kórmeni Ermek Serkebaevtyń ómir jolyna arnap jasaımyz degen jospar bolǵan eken. Alaıda, ýaqyt óte sol dáýirde halyqtyń ystyq yqylasyna bólengen jandardyń óner jolyn da qamtýdy jón kórgen. Mýltımedıalyq kórme jasaýdy osydan 3 jyl buryn Ermek Serkebaevtyń nemeresi Kamıla men Sana usynǵan. Kóp izdenisti talap etken kórmeden HH ǵasyrda Qazaqstannyń mádenıetin damytýǵa úles qosqan shyǵarmashylyq tulǵalarynyń tutas qataryn kóre alasyz.
«Men baqyttymyn. Meniń qyzdarym ákemniń ónerin óte joǵary baǵalaıdy. Mine, ózderińiz kórip turǵandaı, atalaryna arnap osyndaı shara uıymdastyryp jatyr. Meniń ákemniń ómir súrgen ǵasyryn barlyq Almaty turǵyndary kóre alady», – dedi Ermek Serkebaevtyń uly Baıǵalı Serkebaev.
Atalmysh kórme Ermek Serkebaevtyń 40 mınýttyq suhbatyna súıene otyryp jasalǵan. 8 bólimnen turady. 1-shi bóliminde aty ańyzǵa aınalǵan ánshiniń ómir kezeńderi qamtylǵan. Sonymen qatar, kórmeni Ermek Serkebaevtyń uly Baıǵalı Serkebaev dybystaǵan aýdıogıdtiń kómegimen de tanysýǵa bolady.
«Bul kórmeden óte kóp aqparat ala alasyzdar. Sebebi, munda áli esh jerde jaryq kórmegen tyń materıaldar bar. Ár zal ózindik erekshelikke toly. Materıaldardy Ortalyq memlekettik kınofotoqujattar men dybystyq jazbalar muraǵaty, Reseıdiń Memlekettik fılm qory, Serkebaevtar men Jubanovtar otbasylary usynǵan bolatyn», – dedi kórme uıymdastyrýshysy Oksana Shkrygýnova.
Mýltımedıalyq joba qala kúnine oraı uıymdastyrylǵan. Jas shamasy mektep oqýshylary men stýdentterden bastap, aǵa býyn ókilderine deıingi túrli kelýshilerge eseptelgen.
«Jalpy tolyq qamtylǵan dep oılaıymyn. Sharada Ermek Serkebaevtyń ómiri, shyǵarmashylyǵy keń máninde ashylǵan. Uıymdastyrýshylardyń bárin joǵary deńgeıde uıymdastyrǵany kórinip tur», – deıdi kórmege kelýshilerdiń biri Dáýlet Ábdiǵanıev.
«Búgin keshten aıryqsha áserge bólenip otyrmyn. Ermek Serkebaev aǵamyzdyń ómiri men shyǵarmashylyǵyna arnalǵan bul mýltımedıalyq erekshe kórme kelýshilerdiń bárine oı salyp, bir sát tarıhqa kóz júgirtýge, óner adamynyń ómirinen kóp nárseni baǵamdaýǵa túrtki bolǵany anyq», – deıdi taǵy bir kórermen Alına Turarova.
Atalmysh kórme 25 qazanǵa deıin sozylady. Sonymen qatar, kórmeni uıymdastyrýshylar Astana turǵyndarynyń nazaryna usynýdy da josparlap otyr.
