Sheteldikter 150 myń dollarǵa Qazaqstan Respýblıkasynyń azamattyǵyn ala alatyny jaıly aqparat shyndyqqa sáıkes kelmeıdi. BAQ pen áleýmettik jelini sharlap ketken sybysqa qatysty «AHQO Ákimshiligi» AQ basqarma tóraǵasynyń orynbasary Marat Áıtenov osylaı jaýap berdi, dep habarlaıdy Qamshy.kz aqparat agenttigi QazAqparatqa silteme jasaı otyryp.

«Qazaqstannyń buqaralyq aqparat quraldary men áleýmettik jelilerde «Qazaqstannyń azamattyǵyn alý úshin sheteldikterge 150 myń dollaryn tóleý jetkilikti» degen aqparat tarap ketti. Ol habarlamalarda mundaı normanyń ««Astana» Halyqaralyq qarjy ortalyǵy» týraly QR zańyna engizilgen jańa ózgeristerde qarastyrylǵany jazylyp júr. Shyntýaıtynda, atalmysh qujatta Investısıalyq rezıdenttiktiń baǵdarlamasy jazylǵan jáne ol sheteldikterge azamattyq berýdi qarastyrmaıdy», - deıdi Marat Áıtenov. Onyń habarlaýynsha, ınvestorlarǵa beriletin barlyq basymdyqtar Konstıtýsıalyq zańmen ǵana emes, sonymen qatar AHQO qujattarymen de retteletin bolady. «Alaıda Ortalyqtyń qujattarynda ınvestısıalyq rezıdentterge azamattyq berýdi qarastyrý máselesi buǵan deıin kóterilgen emes, kóterilmeıtin de bolady. Sonymen qatar, AHQO óziniń jumysyna qatysty barlyq zań jobalary boıynsha azamattyq qoǵamdastyqtarmen birge konstrýktıvti talqylaý júrgizýge tolyq ázir», - dep habarlaıdy «AHQO Ákimshiligi» AQ basqarma tóraǵasynyń orynbasary Marat Áıtenov.