«Baspana» Ipotekalyq uıymy jas otbasylar men búdjettik sala qyzmetkerlerine qarjylyq júktemeni azaıtý maqsatynda "Jas arman" jáne  "Qamqor baspana" ónimderiniń  ázirlengenin habarlaıdy. Bul týraly Qamshy.kz aqparat agenttigi «Baspana» Ipotekalyq uıymynyń málimetine silteme jasap habarlaıdy.

Ónimder Baspana jáne jergilikti atqarýshy organdar arasyndaǵy yntymaqtastyqqa negizdelip, atalmysh sanattaǵy azamattarǵa "7-20-25" ıpotekasynyń alǵashqy jarnasyn eki esege azaıtýdy qarastyrady.

Jergilikti atqarýshy organdar (budan ári - ákimdikter) oblıgasıalar shyǵarady jáne halyqtyń atalǵan sanaty úshin bastapqy jarnanyń jartysyn sýbsıdıalaýǵa mindettenedi. Óz kezeginde Baspana ákimdikter oblıgasıalaryn satyp alyp, «7-20-25» baǵdarlamasyna qatysatyn banktermen  halyqtyń osy kategorıasyn nesıelendirýdi qamtamasyz etedi.              

«Biz «7-20-25» baǵdarlamasyna jas otbasylar men búdjettik sala qyzmetkerleriniń qatysýyna orasan zor mán beremiz. Olar tarapynan alǵashqy jarnany jınaýdyń qıyndyǵy jóninde kóptegen pikirler kelip tústi. Sol sebepti, qoldaý múmkindikterin barynsha qarastyrdyq. Mundaı áleýmettik sheshimderdi iske asyrý úshin ákimdikter tarapynan  qoldaý kútemiz», - dedi  «Baspana» Ipotekalyq uıymynyń basqarma  tóraǵasy Qaırat Altynbekov.              

"Jas arman" jáne "Qamqor baspana" ónimderi birinshi bolyp Shymkent qalasynda pılottyq rejımde jumys isteı bastady. Taraptar tıisti Memorandýmǵa 2018 jyldyń 3 qyrkúıeginde qol qoıǵan bolatyn. Memorandýmǵa sáıkes Shymkent ákimdigi qaıtarymdy negizde bastapqy jarnany sýbsıdıalaý úshin aǵymdaǵy jyly 500 mln. teńge jáne 2019 jyly 1,5 mlrd. teńge bóledi. Ákimdiktiń qoldaýy 2 myńǵa jýyq jas otbasy men búdjettik sala qyzmetkerlerin qamtıdy dep kútilýde.

Esterińizde bolsa, tamyz aıynyń basynda birqatar buqaralyq aqparat quraldary memlekettik qyzmetkerlerdiń "7-20-25" baǵdarlamasyna qatysý úshin alǵashqy jarnany jınaý qıyndyqtaryna tap bolyp, shaǵymdanǵany jóninde jazǵan bolatyn.