Bıyl alǵash ret «Nur Otan» partıasynyń qoldaýymen «Qazaqstannyń úzdik áleýmettik jobalary» atty baıqaý óz máresine jetti. Baıqaýǵa elimiz boıynsha 300-den astam joba qatysty, dep habarlaıdy Qamshy.kz aqparat agenttigi.

Jeńimpazdar men júldegerlerdi marapattaý rásimine «Nur Otan» partıasy Tóraǵasynyń birinshi orynbasary Máýlen Áshimbaev jáne Eńbek jáne halyqty áleýmettik qorǵaý mınıstri Mádına Ábilqasymova men Parlament depýtattary, úkimettik emes uıym (ÚEU) ókilderi ári bıznes qaýymdastyq ókilderi qatysty.

«Meıirimge ǵana muqtajbyn...». Qazaqtyń birtýar aqyn qyzy Farıza Ońǵarsynovanyń «Jetimniń monology» degen óleńindegi osy joldar barshamyzǵa jaqsy tanys. Keıde bul sózder sol bir jetim balanyń ǵana emes, búkil adamzattyń atynan aıtylyp turǵandaı áser qaldyrady. Sebebi damý jolynda úlken jyldamdyqpen alǵa qaraı júıtkip kele jatqan búgingi álemde shyn máninde meıirim men meıirbandylyq jetispeı jatqanyn kórip júrmiz.

Qýanyshymyzǵa oraı, bizdiń aramyzda júrekterine meıirim uıalaǵan jandar emes. Oǵan keshe ǵana máresine jetken «Qazaqstannyń úzdik áleýmettik jobalary» baıqaýynyń jeńimpazdaryn marapattaý rásiminde taǵy bir márte kóz jetkizdik», - dep jazdy «Nur Otan» partıasy tóraǵasynyń birinshi orynbasary Máýlen Áshimbaev óziniń Facebook-tegi paraqshasynda.

Baıqaýdyń áleýmettik, rýhanı jáne tárbıelik mán zor. Birinshiden, baıqaý belsendiligimen tanylǵan qoǵamdyq uıymdarǵa ári jeke azamattarǵa qoldaý kórsetýge múmkindik beredi, ekinshiden, álgi jeke uıymdar men azamattardy kópshilikke úlgi-ónege etip kórsetýge jol ashady. Áshimbaevtyń aıtýynsha, dál osy sebepti «Nur Otan» partıasy baıqaýǵa belsene atsalysqan. Ári baıqaýdyń jalpyulttyq deńgeıge kóterilýine aıtarlyqtaı úles qosyp otyr.

«Osy rette baıqaýǵa qatysqan barlyq jobanyń jeńiske laıyqty bolǵanyn aıtqym keledi. Olardyń árqaısysy qoǵamdaǵy ózekti máselelerdi qamtyǵan. Máselen, jeńiske jetken Rásıma Temerbaevanyń bastamasy shyn máninde úlken júrek pen meıirimdi qajet etedi. Atalǵan joba boıynsha sońǵy úsh jylda 60 myńnan astam túski as tegin taratylǵan. Bul júrekterge meıirim shýaǵyn shashatyn izgi amal ekeni sózsiz», - dedi Máýlen Áshimbaev.

Aıta keteıik, 1-oryndy «Zeınetkerlerge tegin túski as» jobasymen qatysqan Rásıma Temirbaeva aldy. «Bul – barlyq qaıyrymdy jannyń jemisi»,  - dedi jeńimpaz óz sózinde. Al ekinshi oryndy «Arbadaǵy kedergisiz ómir» jobasymen qatysqan Nurbolat Qarabasov jáne «El nazy» art-terapıamen damytý ortalyǵy jobasymen qatysqan belgili ánshi Kenjebek Janábilov aldy. Ánshiniń ulynyń estý qabileti tómen bolǵandyqtan em izdep álem sharlaǵan. Tıisti operasıa sátti ótkendikten balasy búgin de jaza da, oqı da alady. Mundaıdy basynan ótkergen Kenjebek Janábilovtiń ózi de basqa ata-analarǵa kómektesýdi maqsat etedi. Sóıtip «El nazy» atty jobasyn jasap shyǵarady.

 3-oryndy «Meıkaton «TOM: Kazakhstan» jobalarymen Marjan Mádıeva jáne Sánıa Arapova ıemdendi. Mańǵystaýlyq arýlar «Úmit sáýlesi» atty avtorlyq telebaǵdarlamalar arqyly sońǵy 11 jylda talaı janǵa kómek qolyn sozyp keledi. Ásirese, jalǵyz qalǵan qarıalar men ata-ananyń qamqorlyǵynsyz qalǵan balalarǵa osy baǵdarlamanyń arqasynda tyǵyryqtan shyǵar jol tabýǵa kómektesken.

Budan bólek daýys berý nátıjesi boıynsha arnaıy syılyqtar tabystaldy.

«Qazirgi tańda izgilik pen meıirimniń dánegin seýip júrgen osyndaı jobalardy keńinen dáripteýdiń bereri mol. Sondyqtan partıamyz aldaǵy ýaqytta da bul baǵyttaǵy jumystaryn odan ári jalǵastyratyn bolady. Sebebi, qurmet, izgilik, qamqorlyq sıaqty adamı qasıetterge negizdelgen mundaı jobalardyń mańyzy qashanda joǵary. Óıtkeni, álemdi meıirim qutqarady. Sondyqtan árqaısymyz qasymyzda júrgen janǵa meıirim syılap, osy bir asyl qasıettiń aıasyn keńeıtýge atsalysaıyq», - dep sózin qorytyndylady Máýlen Áshimbaev.