2018 jyldyń 17 qazany Reseı úshin qaıǵydan qan jutqan kúnge aınaldy. Qyrymǵa qarasty Kerch qalasy áli kúnge deıin qara jamylyp otyr. 21 jetkinshek kolejge sabaq oqýǵa ketip, ystyq uıalaryna oralmady. Qanshamasy aıaq-qoldan aıyrylǵan, aýrýhanada ota jasaý kúnin asyǵa kútip jatyr. Olardyń tiri qalǵandaryna ata-analary baqytty. 17 qazan tarıh qoınaýyna Kerch teraktisi bolyp endi. 18 jastaǵy Vladımır Roslákov bolsa reseılik BAQ-tyń tilimen aıtqanda o dúnıege qasapshy attandy.
Temeki shekpegen, syra ishpegen, sabaqtan qashpaǵan, eshkimmen arazdaspaǵan Vladımır Roslákovtyń bıografıasynan reseılik jýrnalıserdiń zertteý júrgizýi arqyly belgili bolǵan faktilerdi oqyrman nazaryna usyna otyryp, osyndaı zulymdyqqa barýyna ne túrtki bolǵanyn saralap kóreıik.
02 mamyr
2000 jyldyń 02 mamyry – Roslákovtyń dúnıege kelgen kúni. Ákesi de, sheshesi de bar baqytty bala. Áke-sheshesiniń asyp-tasyǵan baılyǵy bolmasa da, Vladımırdiń qarnyn toq qylýǵa jaǵdaılary jetetin. Mektep tabaldyryn alǵash attaǵan kezden-aq Vladımır ata-analarynyń kóńilderine qaıaý túsirgen emes. №13 mektepte Vladımırmen birge oqyǵan synyptastarynyń aıtýynsha, ol óz ortasynyń gúli bolmasa da, tikenegi bolǵan emes. Elden erekshelenip turmasa da, negatıv pen ázil-ospaqtyń nysanyna da aınalǵan joq-tyn. «Ol kádimgi tynysh oqýshy bolatyn. Bir-eki jaqsy aralastyn dosy boldy. Mektepten ketkennen keıin de olar baılanystaryn úzgen emes»,- dep eske aldy bir synyptasy.
10 jyl buryn
Vladımırdiń anasy Iegova kýágeri (RF-da, QR-da tyıym salynǵan sekta túri-red.) ekendigin búkil kórshi-qolań biletindigi jasyryn emes eken. Ol kisi 10 jyl buryn solarǵa ımandaı senip, nanym-senimin ózgertipti. Iegovany jaratýshy retinde tanyǵan áıel balasyna da basqasha qaraı bastaǵany aıtpasa da túsinikti. Dostarymen birge qydyrýǵa, oınap-kúlýge, kınoteatrǵa barýǵa tyıym salǵan Vladımırdiń anasy ulyna qyryq tyıym jasaý arqyly ońbaı qateleskenin ol kezde bilmedi, sezbedi. Sebebi sol kezden bastap anasynyń aıtqanynan shyqpaǵan Vladımır ýaqyt óte kele tomaǵa-tuıyq janǵa aınalady. Qurby-qurdasymen emes, kompúterimen syrlasady.
8 jyl buryn
Balasynyń ózin-ózi óltirip qana qoımaı, kolejinde jarylys jasap, qasapshyǵa aınalǵanyn estigen ákesi balasyn kinálamaıtynyn jetkizdi. Jan jarymen 8 jyl buryn aıyrylysqan Vladımırdiń ákesi balasymen de 8 jyl boıy kórispegenin, aralaspaǵandyǵyn aıtty. «Áıelim balamdy maǵan kórsetkisi kelmedi. Bizdiń qoıan-qoltyq aralasýymyzǵa úzildi-kesildi qarsylyq tanytty. Men de «qosh» dedim», - dep jýrnalıserge syryn aqtarypty. Vladımır er jetip, ákesiniń demeýine muqtaj bolǵan shaqta ákesiniń nazarynan tys qalýy ony qamyqtyryp, psıhologıalyq soqqy alǵanyn oqyrmannyń ishi sezip otyrǵan shyǵar. «Vladımırden aıyryldyńyz. Ne deısiz?» degen jýrnalısiń suraǵyna soǵystan kontýzıa alǵan aýǵan soǵysynyń ardageri bylaı dep jaýap berdi: «Ol meniń qanym, ol meniń sarǵaıa kútken balam bolatyn. Vladımır qarapaıym bala bolyp ósti. Balalarǵa arnalǵan ádebıetke qatty qyzyǵatyn. Al búgin ol jaı ǵana múrde. Múrdeni keshirýge nemese keshirmeýge bolmaıdy. Óz basym pravoslav dininiń ókilimin. Burynǵy áıelim Iegova kýágeri. Vladımırdi shaıtan azǵyrdy dep bilemin. Basqa aıtarym joq». Vladımırdiń ákesin aýla balalary mas kezinde ustap alyp, taıaqtyń astyna alǵandaryn kórshi-qolańdary jaıyp saldy. Taǵdyrdyń tezine ushyraǵan Vladımırdiń ákesi qarý-jaraq tyǵylǵan jer bar ekendigin aıtqanda eshkim senbegeni de osydan.
Vladımır Roslákovtyń ájesi kezinde ulaǵatty ustaz bolǵan jan eken. Qazir jasy 76-da. Ájesi jaqynda ǵana 20 000 rúbl aqshasynyń joǵalyp ketkenin BAQ-qa aıtyp berdi.
2017 jyldyń qańtary
Mine, osy ýaqyttan beri Vladımır Roslákov teraktige daıyndalǵan desedi. Kolejde kóńil-kúıi kóterilip, ashylǵan boıda Vladımırdiń bir kúni sheteldegideı búkil kolejdi qyryp salǵysy keletindigin aıtqanyn grýppalastary endi eske túsirip otyr. Áleýmettik jelide Anatolıı Smırnov degen atpen qurbysymen hat almasyp otyratyn Vladımır oǵan da osyndaı josparlarynyń bar ekendigin aıtyp qalǵan. Árıne, ol kezde eshkim oǵan mán bermegen. Biraq kórshi-qolań Vladımırdi mysyq-ıtterdi qınaýshy manák retinde biledi eken. Alaıda ishtegi ashý-yzasyn maqulyqtan alatyn Vladımırdiń eskertýlerinen ol kezde eshkim sekem almady.
1999 jyl
1999 jyldyń 20 sáýirinde AQSH-tyń Kolorado shtatyndaǵy «Kolýmbaın» mektebiniń eki oqýshysy Erık Harrıs pen Dılan Klıbold ózderiniń synyptastaryn, muǵalimderin qyryp salǵan. Bul jantúrshigerlik oqıǵa tarıh qoınaýyna Kolýmbaın teraktisi retinde endi. 13 adamdy óltirip, otyz shaqtysyn jaraly etken eki bozbala bul qylmysqa uzaq ýaqyt daıyndalǵan. Tipti bul týraly ózderi arnaıy qurǵan saıtta da jazyp ótken. Alaıda eshkim mán bermegenniń nátıjesinde oıǵa alǵandary ońaı iske asady. Eń qyzyǵy, kerchtik Vladımır Roslákov osy ekeýin úlgi tutqan. Kerch teraktisiniń júıesi, Vladımırdiń kıiný stıli, ózin Harrıs pen Klıbold sekildi kitaphanada atýy – bári-bári sonyń aıǵaǵy. Kolýmbaın teraktisi týraly túsirilgen «Klass» degen kıno da Roslákovtyń súıikti fılmi eken. Ol bul týraly birneshe ret grýppalastaryna aıtqan. Roslákov degenine jetti. 13 emes, 21 adamdy ajal qushtyryp, amerıkalyq «kýmırlerin» shań qaqtyryp ketti.
2014 jyl 07 shilde
Vladımır Roslákov «vkontakte» áleýmettik jelisinde Vlad Roslákov degen atpen tirkelgen. Paraqshasyna kóz júgirte otyryp, onyń Pýtınniń fanaty bolǵandyǵyn birden baıqaýǵa bolady. Pýtınniń fotolaryn paraqshasyna kóp salǵan Vladımır 2014 jyldyń 07 shildesinde «Bul memleketti jeńý múmkin emes» degen toptyń agıtasıalyq sýretterin bóliskenin kóre alamyz. Ol sýretterde bárin qyryp-joıýǵa daıyn Reseıdiń agresıaly keskin-kelbeti beınelengen.
18 shilde 2018 jyl
Dál osy kúni Vladımır Roslákov Semferopol qalasyna sapar shegedi. Qydyrý úshin emes, myltyqty qoldaný erejeleriniń qyr-syryn meńgerý úshin. 6 saǵatqa sozylǵan dáris úshin Roslákov «Egıda» ortalyǵyna 4 000 rúbl tólepti. Sol ortalyqta Roslákovqa dáris bergen ınstrýktor bylaı dep eske alady: «Ol meniń kózime birden tústi. Bárin bilgisi keletindigi unady. Biz myltyqty qalaı ustaý kerektigin, qaýipsizdik sharalaryn, oqys jaǵdaıda kórsetiletin alǵashqy medısınalyq kómek týraly sóz etemiz. Odan keıin synaq alamyz. Men oǵan bes baldyq shkala boıynsha tórt degen baǵa qoıar edim. Bizdiń dáristi támamdaǵannan keıin qarý-jaraqty satyp alý úshin lısenzıa alý shartty».
08 qyrkúıek 2018 jyl
Jańa oqý jyly bastaldy dep el-jurt qýanyp júrgen kezde Roslákov josparyn júzege asyrýǵa belsendi túrde kirisken. Ol lısenzıaǵa qol jetkizgennen keıin qarý satyp alýǵa asyqqan eken. Nazary kalıbri 12 mıllımetrlik, túrkıalyq Hatsan Escort degen pomptyq myltyqqa túsedi. Bul myltyq nysanaǵa únemi dóp tımegenimen, dybystyq qýattylyǵy zor bolatyn. Jáne mundaı myltyqtardyń oqtaryn tez aýystyrýǵa bolady. Osyndaı erekshelikterge Roslákov mán bergen bolsa kerek. 21 adamnyń ómirin jalmaǵan myltyq satylǵan dúken búgingi tańda jabyq tur. Dúken óz jumysyn qaıtadan jandandyra ma belgisiz.
13 qazan 2018 jyl
Roslákov myltyqty maqsatty túrde satyp alǵany aıan. Endigi kezekte ol oq satyp alýdy kózdedi. Oqty basqa dúkennen satyp alýdy jón dep sheshedi. Roslákovqa oqty satqan dúkenniń dırektory Anatolıı Lýnev bylaı deıdi: «13-shi qazan kúni keldi. Myltyq ustaýǵa ruqsat qaǵazyn kórsetti».
Osynyń bárine 18 jastaǵy Vladımır Roslákov qaıdan aqsha tapty degen zańdy suraq týyndaıdy. Sebebi myltyqqa 20 000-daı, 15 qorap oq úshin 6 000-daı, atý klýbynda dáris alý úshin 4 000 rúbl ketken. Sonymen qatar myltyqty jasyrý úshin seıf satyp alǵany, lısenzıaǵa aqsha tólegeni belgili. Ájesiniń 20 000 rýblin urlaǵan Vladımır delik, al qalǵan 20 000-dy Roslákov kimnen aldy?
17 qazan 2018 jyl
Eki kún “aýyryp qaldym» dep sabaqqa barmaǵan Vladımır bul kúni kolejge keshteý shyǵady. Anasynyń jumysqa ketkenin kútken bolý kerek. Roıalkovtardyń úıinen kolejge deıin 15 shaqyrym. Vladımır №41-shi avtobýsqa otyryp, bir saǵattaı jol júredi. Qolynda aýyr jolsómke. İshinde myltyq, dári jáne jarylǵysh zattar... Aıalmadan túsip, kolejge keledi. Eshkimniń kózine túspesten kolejge enedi. Ol artyna qarap burylmaıdy...
80%
Vladımırmen birge bir topta oqyǵan stýdent bala ǵalamtordy sharlap júrgen aqparattyń 80%-y jalǵan ekendigin aıtypty. «Vladımırdi topta eshkim uryp-soǵyp, masqara etip, qanaǵan emes. Bizdiń toptaǵy balalar baısaldy. Bireýge ádeıi soqtyqpaıdy. Jáne Roslákov ta áljýazdardyń qatarynan emes. Ol kezinde boks úıirmesine qatysqanyn bilemiz. Birde bokstyń qolǵabyn kıip alyp, bir-birimizdi jekpe-jekke shaqyrǵanbyz. Sol kezde Roslákov toptaǵy eń myqty, bilekti degen balany jyǵyp salǵany shyndyq».
Roslákovtyń «shabyt alǵan» Kolýmbaın teraktisin jasaǵan eki amerıkandyq jigit kompúter oıyndaryna kirip ketkenderi sonshalyq psıhıkalyq aýytqýlarǵa ushyraǵan. Bireýi tipti psıhıatrǵa jıi baryp turǵan. Roslákov ta álemnen oqshaýlanyp, kompútermen dos bolǵan kúni tragedıa bastaý aldy dep túsinemiz. Sondyqtan da qadirmendi ata-ana, balańyz qandaı kompúterlik oıyn oınaıdy, ǵalamtordan qandaı aqparat izdeıdi, bilip júrińiz, jaǵdaıdy baqylaýda ustańyz.
