QR Densaýlyq saqtaý jáne áleýmettik damý mınıstrliginiń "Kóshi-qon, eńbek jáne áleýmettik qorǵaý" komıtetiniń tóraǵasy Aqmadı Sarbasov shette júrgen etnıkalyq qazaqtarǵa  Qazaqstan azamattyǵy men oralman kýáligin alýda birqatar jeńildikter qarastyrylady dep málimdedi. Bul týraly "Qamshy" portaly habarlaıdy.

"Qazirgi tańda elimizde shette júrgen qandas baýyrlarymyzdy, etnıkalyq qazaqtardy ózderiniń atamekenderine, ıaǵnı, Qazaqstanǵa ákelý úshin, olarǵa birinshi, jaǵdaı jasap, túrli áleýmettik jeńildikter kórsetetin zań jobasy ázirlenýde. Atalmysh zań jobasynda shet elderden kóship keletin etnıkalyq qazaqtarǵa oralman kýáligin alýdy jeńildetý, oralman kýáligin alǵannan soń, bir jyldyń ishinde Qazaqstan azamattyǵyn berý, (qaı oblys nemese aımaqqa qonys aýdarsa - sol jerden qujattaryn ázirlep berý), sondaı-aq, kóship kelip qonystanǵan jerinde túrli áleýmettik jeńildikterdi, komýnaldyq shyǵyndar, kólik shyǵyny, baspanamen qamtamasyz etý, mektep jasyndaǵy balalarǵa qolaıly mektepterge ornalastyrý jáne t.b. sekildi birqatar jeńildikter qarastyrylǵan",-dedi Sarbasov.

QR DSÁDM ókiliniń aıtyýynsha, atalmysh zań jobasy qazir QR Parlamentiniń qaralýyna jiberilgen.

Al QR Konstıtýsıasynyń  "QR Azamattyǵy" týraly babynda Qazaqstan azamattyǵyn shet elderden kelip, QR terıtorıasynda keminde jyl turǵan etnıkalyq qazaqtar ala alady delingen. Sondaı-aq, atalmysh kýálikti alý úshin QR azamatymen shańyraq kóterip, keminde 3 jyl QR terıtorıasynda turýy shart.

"Deı turǵanmen, QR azamattyǵyn alý týraly jańa ázirlengen zań jobasynda shetten kelgen qandastarymyzǵa oralman kýáligi jáne Qazaqstan azamattyǵyn alýda jeńildikter jasalady dep kórsetilgen. Sonymen qatar, parlamentke qaralýǵa jiberilgen materıal qaralýǵa jiberilgen merzimnen 3 aıdan artyq jatýǵa bolmaıdy", deıdi Sarbasov myrza.