Osydan birer apta buryn Sahle-Vork Zevde Efıopıanyń tuńǵysh áıel prezıdenti atansa, endi mine Grýzıanyń bılik tarıhyna taǵy bir áıel kelip jatyr. Aldyn ala málim bolǵan derekterge qaraǵanda, jeksenbi kúni Grýzıada ótken prezıdenttik saılaýda táýelsiz kandıdat Salome Zýrabıshvılıdiń jeńiske jetkeni habarlandy. Ol 38,82 daýys alyp birinshi orynǵa shyqsa, 37,68 paıyzben opozısıalyq kandıdat Grıgol Vashadze ekinshi oryn aldy.
♦Bılikke tuńǵysh áıel prezıdent keldi, endi Efıopıada matrıarhat ornaı ma?
Grýzıanyń Ortalyq saılaý komısıasynyń málimetinshe, saılaýǵa halyqtyń 46,74 paıyzy qatysqan. Derekke júginer bolsaq, prezıdenttikke úmitkerlikke 25 adam usynylǵan. Olardyń ishinde basty básekeles retinde Grýzıanyń burynǵy Syrtqy ister mınıstri, «Grýzın armany» partıasynyń atynan usynylǵan táýelsiz kandıdat Salome Zýrabıshvılı men «Kúshimiz – birlikte» birikken opozısıalyq partıasynyń úmitkeri Grıgol Vashadze boldy. Nátıjesinde Grýzıadaǵy qazirgi bıleýshi partıanyń ókili Salome Zýrabıshvılı jeńiske jetti. Al «Kúshimiz – birlikte» saıası uıymy Grýzıanyń qýǵynda júrgen burynǵy prezıdenti Mıhaıl Saakashvılıdiń partıasy ekenin aıta ketý kerek.
Qazirdiń ózinde jeńiske jetken Salome Zýrabıshvılıdi Parlament spıkeri Iraklıı Kobahıdze, Tbılısıdiń meri, «Grýzın armany» partıasynyń basshysy Kaza Kobadze quttyqtap úlgerdi.
Biraq aldaǵy eki aptadan keıin kimniń basym daýys jınaǵany belgili bolmaq. Sarapshylardyń keıbir áńgimelerine qaraǵanda, aldaǵy ýaqytta prezıdenttikke saılaýdyń ekinshi týry ótýi múmkin. Óıtkeni atalǵan úmitkerlerdiń ekeýi de jetkilikti dárejede 50 paıyzdyq mejeden óte almaǵan. Mıhaıl Saakashvılıdiń áriptesi «Kúshimiz – birlikte» saıası partıasynyń atynan túsken úmitker Grıgol Vashadze ekinshi týrda jeńisti sózsiz alatynyna senimdi otyr.
...Eki jyldan keıin bizde de prezıdenttik saılaý. Kim keler eken?! Áıel me, erkek pe?!
