Komsomoldyń 100 jyldyǵy Almatydan bastaý alǵannan keıin aımaqtarǵa da aýysa bastady. Qazir jer-jerde qyzyl komsomoldyń mereıtoıy saltanatty túrde  toılanyp jatyr. Bárinen buryn, moınyna qyzyl galstýk baılap alǵan balalar kimniń toıy, bul jerde kimniń múddesi turǵanyn bilip te turǵan joq. Kesheden qalǵan ámirshil-ákimshilik komýnıstik júıeniń jandaıshap balasy komsomoldyń 100-ge tolǵany  eńsesin kótergen elge búgin kerek pe, edi?  «Táýelsizdik tuǵyrymyzǵa qondy» dep qýanyp júrsek, jastardyń keshegi «kósemderin» ańsaıtyndar bar eken. Keshe Atyraý oblystyq ishki saıasat basqarmasy óńirde komsomoldyń 100 jyldyǵyn toılaýǵa tyıym saldy. Jas urpaqtyń sanasyn ýlamaı, máseleniń aldyn alǵany úshin úlken rahmet, olarǵa! Biraq...

Búkil áleýmettik jeli shýlap, jurtshylyq alańdap jatqanda, Jetisý óńirine tarap jatqan aımaqtyq basylym bútindeı bir sanynyń úsh betin komsomoldyń 100 jyldyǵyna arnady. Eń ókinishtisi sol, estip, bilgenimizdeı, «Alataý» atty aımaqtyq gazettiń bas redaktory aıtýly aqyn Aıtaqyn Bulǵaqov eken. Jurt qazaqtyń qanyn júktegen komsomoldan jerip jatqanda, ataqty aqyn Aıtaqynnyń «Jetisý jastarynyń kósemderi» dep aıqara betke maqala basqany nesi?!

Áriptesterden surap bilgenimiz, aımaqqa taraıtyn «Alataý» basylymy «Almaty –bolashaq» aksıonerlik qoǵamy Taldyqorǵan fılıalynyń gazeti bolyp shyqty. Eń bir qyzyǵy, «Jetisý jastarynyń kósemderiniń» qatarynda Almaty oblystyq «Nur Otan» partıasy fılıaly tóraǵasynyń birinshi orynbasary Ǵalıasqar Sarybaev pen oblystyq ishki saıasat basqarmasynyń basshysy Rýstam Alpysbaev ta  sýretterimen  júr.

Iá, olar buryn, ıaǵnı keńestik kezeńde komýnıstik júıede, komsomolda qyzmet istegen shyǵar. Biraq komsomol men «Nurotandy» qıystyrý qanshalyqty qısynǵa keledi?! Búgingi jas urpaq qabyldaı almaıtyn «elesi» de este qalmaǵan ótken qoǵamdy jańǵyrtý kimge kerek?

...Ne jazsaq ta, ne istesek te, oılansaq etti?!