"Komsomoldyń jyry" Parlamentke de jetti. Májilistiń búgingi otyrysyn vıse-spıker Vladımır Bojko dál sol "jas lenınshilerdiń" týǵan kúnimen quttyqtaýmen bastady. Jáne de ózin ózge áriptesteri óre túregelip qoldaıtynyna senimdi edi. Olaı bolmady. Birdi-ekili qoldaǵandar boldy, árıne. "Aq joldyq" Azat Perýashev Bojkonyń bulaı bura tartýyna jol bermedi. Vıse-spıkerdiń táýelsiz Qazaqstanda turatynyn esine salyp, "respýblıkada mundaı mereke joq" dep shart ketti. Komsomolshyl Bojkoǵa túsinikti tilde aıtqan Perýashevtiń pikirin sol qalpynda jarıalap otyrmyz (orysshadan qazaqshaǵa aýdardyq-red.). 
"- Siz ekeýmiz Parlament Májilisiniń resmı otyrysynda otyrmyz. Vladımır Karpovıch, siz "bismilláni" komsomoldar merekesimen áriptesterińizdi quttyqtaýdan bastadyńyz.  Sonda qaı elde ómir súrip jatyrsyz? Esińizden shyǵyp ketse, aıtaıyn, egemendi Qazaqstannyń turǵynysyz. Bizdiń elde ondaı mereke atymen joq. Sondyqtan da quttyqtaýdyń esh qajettiligi joq. Bireý úshin jekemenshik mereke bolsa, bir-birińizdi jumystan tys ýaqytta, basqa jerde quttyqtańyzdar",-dedi Azat Perýashev.

Arman Sqabyluly