Kásipqoı boksta qazaq eliniń abyroıyn asqaqtatyp júrgen otandasymyz Qanat Islam IBO (halyqaralyq boks uıymy) reıtıńinde tórt saty joǵarylady.
IBO jańarǵan reıtıńinde Qanat Islam 77-shi orynnan kórindi. Birinshi orta salmaqta baq synaıtyn otandasymyz naýryz aıynyń sońynda Kolýmbıada jergilikti boksshy Orlando Hesýs Estradany jeńip, «WBA Fedelatin» ataǵyn qorǵap qalǵan bolatyn. Qazirgi tańda qazaqstandyq boksshy kásipqoı rıngte 19 kezdesý ótkizip úlgerdi. Onyń 16-syn nokaýtpen aıaqtaǵan. Kelesi kezdesýin AQSH-ta ótkizýdi josparlap otyr. Ázirge jekpe-jektiń ýaqyty men boksshynyń kimmen judyryqtasatyny anyqtalǵan joq.
Jańarǵan IBO reıtıńinde Qanat Islamnan ózge qazaqstandyq boksshylardyń nátıjeleri kórsetilgen. Beıbit Shúmenov bir saty tómendep, 18-shi orynǵa turaqtasa, Isa Aqberbaev 50-shi ornyn saqtap qalǵan. Jeńil salmaqta Janat Jaqıanov bes saty tómendep, 21-shi orynǵa syrǵydy.
