Sońǵy kezderi álemdik aqparat quraldarynda jáne áleýmettik jelilerde beıresmı "Irak-SHam Islam memleketi" atalyp júrgen ISHIM sodyrlarynyń qatary Orta Azıa elderi  azamattarymen tolyǵyp kele jatqany qyzý talqylanýda. Osy rette aıta ketetini,  BUU-nyń resmı statısıkasynda ISHIM sapynda álemniń 129 memleketinen azamattar soǵysyp júr dep kórsetilgen. Ásirese, ISHIM maıdanyna attanýshylardyń (jıhad etýshiler) sońǵy legi Túrik shekarasy arqyly ótip jatyr degen aqparat tarala bastaǵanymen, bul resmı mekemeler tarapynan rastalmaǵan bolatyn. Endi, mine, túrkıalyq basylymdar qoǵamda rezonans týdyratyn  aqparatty jarıalap otyr.  Keshe túrkıalyq  AKTİF HABER basylymynda "Jıhadshylar Sırıaǵa túrik pasportymen barýda" atty maqala jaryq kórgen. Maqalada Sırıadaǵy sodyrlardyń qataryna Orta Azıadan attanýshylar týraly tyń derekter aıtylǵan. Osyǵan oraı "Qamshy" portaly túrik tilindegi maqalanyń qazaqsha aýdarmasyn nazarlaryńyzǵa usynady.

ISHIM sodyrlarynda túrik pasporty

ISHIM-niń Sırıadaǵy soǵys maıdanyna sodyrlar jiberýmen aınalysatyn jasyryn júıe Túrkıanyń Ystanbul qalasynda ornalasqan.

Túrik tólqujattary arqyly Túrkıa shekarasyna ótýshiler Ystanbulda bir kún aıaldap, artynan soǵys maıdanyna jóneltiledi. Túrkıalyq Meydan Gazetesi basylymy Ystanbul qalasynda ornalasqan jalǵan túrik tólqujattaryn jasaýmen aınalysatyn terorıstik uıymdy áshkerelegen.

Taıland, Malaızıa jáne Ystanbul

Qytaıdan ISHIM sapyna qosylýǵa nıet bildirýshilerden 200 AQSH dollary kóleminde tólem alynady. Osylaısha, jalǵan túrik tólqujatyn alǵan Qytaıdyń shyǵys bóligendegi uıǵyr azamattar Qytaıdan Taılandqa, sosyn Kambodjaǵa qashyp keledi. Kambodjada az aıaldaǵan soń, Malaızıaǵa attanady. Túrkıa Respýblıkasy men Malaızıa arasynda vıza jeńildigi baryn jaqsy túsinetin sodyrlar ushaq arqyly Ystanbulǵa kelip qonady.

Ystanbulda bir kún

Osylaısha Ystanbulǵa jetken sodyrlar ISHIM-niń aldyn-ala belgilep qoıǵan qonaq úıleri, pansıonatary nemese jaldamaly páterlerine bir kún qonyp, ISHIM-niń Sırıa men Iraktaǵy maıdandaryna jóneltiledi.

100 myń túrik tólqujatynyń 50 myńy Qytaıǵa jóneltilgen

2011 jyldan beri Qytaı uıǵyrlaryn  Túrkıa jáne Eýropanyń birqatar elderine týrıs retinde erkin ákelip júrgen uıǵyr kásipkeri T. Nýralı esimdi azamat máseleniń aq-qarasyn ashyp bergen. Ol 2011 jyldan beri qaraı jalǵan tólqujat jasaýmen aınalysyp kelgen. Árıne, jumysynyń aqysy da aýyz toltyryp aıtýǵa turarlyq. Nýralıdiń aıtýynsha osy ýaqytqa deıin ol 100 myń túrik tólqujatyn jasap bergen. Olardiń 50 myńnan astamy Qytaıǵa jiberilgen.

Arnaıy ISHIM sodyrlary úshin Nýralıdiń esimi ári jasyryn kod - Abbas. ISHIM sodyrlarynyń Qytaıdaǵy ókilderi osy ýaqytqa deıin 50 myńnan astam túrik tólqujatyn arnaıy jasatqan.

Aýdarǵan Nurgeldi Ábdiǵanıuly