Qazir búkilreseılik ınternet kózderi Iakýtskiniń meri bolǵan Sardana Aksenteva týraly tolǵana jazyp jatyr. Shyndyǵynda qyzmetine kiriskenine bir aıdan sál  assa da,  onyń kózqarasy erekshe bolyp otyr.

Jalpy «Qys Iakýtıadan bastalady» degen sóz tirkesi bar. Bul ras. Sardana qyzmetine kirise salysymen eń aldymen qysta jolǵa asfalt tóseıtinderge tyıym saldy. Ekinshiden,  búkil aýlaǵa kirip, óz aıaǵymen jumysty tekserdi. Qurylys okrýginiń basqarmasyna kirdi. Jumysta 15 adam bolýy tıis bolsa, onyń 13-i joq. Bireýi masań kúıinde otyrǵan. Bárin jumystan qýdy.

Úshinshiden,  osy ýaqytqa deıin búkil jergilikti sheneýnikter minip júrgen asa qymbat sheteldik kólikterdiń bárin satty. Keregi joq jıyndar men ortalyqqa jónsiz baratyn sheneýnikterdiń issaparlaryn kúrt qysqartty.

Saılaý kezinde Pýtınniń «Edınaıa Rossıa»  partıasynyń atynan synǵa túsken básekelesin jolda qaldyryp, mer bolǵan áıeldiń áreketi shyndyǵynda shynaıy.  Atqarǵan jumysy ańyzǵa aınalyp bara jatyr. Kózqarasy halyqtyń kóńilinen shyqty. Biraq aqıqatty qaıtpaı aıtatyn mundaı qaısar áıel kimge unaı qoısyn?! Halyqpen kezdesip turǵan sátte qarsylastary onyń betine boıaý shashty. Jumyrtqa laqtyrdy. Biraq saǵy synbaǵan Sardana keri shegingen joq. Qazir  qalany sybaılas jemqorlyqtan tazartyp jatyr.

Eki oqý ornyn bitirip, Iakýtıada ártúrli qyzmette kásibin jalǵastyrǵan ol 2012 jyly qala meriniń orynbasary bolyp jumys istedi. Basshysymen kelispedi. Aqyry osydan birer aı buryn ótken saılaýda jeńiske jetti.  Qazir «halyqtyń ákimine» aınaldy. Ol – eldiń ortasynda. Kabınetinde otyrmaıdy. Elmen etene jolyǵyp, kóshe kezip, túıtkildi jaǵdaılardy sheship, túıindi máselelerdi izdep júr.

... Bizdiń qoǵamǵa da saǵy synbaıtyn bir Sardana kerek-aý. Biraq sybaılas jemqorlyqqa bylǵanǵan, kabınette búrokratıalyq júıeniń tutqasyn ustap otyrǵan kishkentaı sheneýnikter jańasha oılaıtyn jandardy júıege jaqyndata qoıar ma eken?!. Másele sonda!