Búgin Almatyda mánerlep syrǵanaýshy Denıs Tenniń týyp-ósken úıinde memorıaldy taqta ornatyldy. Oǵan sportshynyń ata-anasy, dostary men Denıs Tendi qurmetteıtin azamattar jınaldy. Memorıaldy taqtanyń saltanatty ornatylý sharasyna Denıs Tenniń Reseıden áriptesteri men jattyqtyrýshylary keldi. Olardyń arasynda  SSRO-nyń eńbek sińirgen jattyqtyrýshysy, halyqaralyq dárejedegi SSRO sport sheberi, Reseıdiń eńbek sińirgen artısy Tatána Tarasova da bar.

Bári jaqsy, bári durys. Biraq, memorıaldy taqtany saltanatty túrde ornatý sharasynda qoıylǵan bannerde qazaq tilinde bir aýyz sóz bolmaǵany qynjyltty. Bul jerde Qazaqstan Respýblıkasynyń Til týraly zańy nelikten oryndalmaı otyr? «Bul memorıaldy taqtadaǵy jazýdy Reseıden kelgen qonaqtar túsinse boldy» degen uǵymdy bildire me?  

Bannerdegi orys tilinde jazylǵan mátinde qate ketkennen keıin orystar ornynan óre túregelip shýlasty. Qate jibergen mekemeniń keshirim suraýyn talap etti. Keshirim suratty da. Gramatıkalyq qateniń ketkenin keshirmedi. Orystar ana tili úshin jany ashydy, óz quqyǵyn talap etti. Ketken qatelikti jyly jaýyp qoımady.

Al bannerde qazaq tilinde bir aýyz sóz jazylmaǵany úshin kim keshirim suraıdy? Bul jerde másele qateden de tereńirek, ıaǵnı bannerde qazaq tiline múlde oryn berilmegeninde bolyp tur emes pe? Oryssha mátinde ketken qateligi úshin bannerdi jasaǵan mekeme keshirim surasa, bannerde qaza tilinde mátin bolmaǵanyna sharany uıymdastyrǵan uıym túsinikteme berip, keshirim suraýyn talap etemiz.

Denıs Ten Reseıde, shetelde jattyqsa da, ol – Qazaqstannyń sportshysy. Qazaqstannyń azamaty. Sport dodasyna da bizdiń elimizdiń  atynan shyǵyp, Qazaqstannyń týyn kókte jelbiretti. Biraq Ten abyroıyn asyrǵan memlekettiń tili nelikten eleýsiz qaldy?

Reseıden kelgen qonaqtar bannerde birde-bir qazaq tilinde sóz bolmaǵanyna mıyǵynan kúlip ketken bolar.

Bul rette tek Reseı emes, álemdik muz aıdynynyń hanzadasy Denıs Tenniń qurmetine, onyń týyp-ósken úıine memorıaldy taqtany ornatý sharasyndaǵy bannerde memlekettik tilge oryn tabylmaǵany uıat...