Atyraý qalasyndaǵy «Tamasha» oıyn-saýyq kesheninde ulttyq qolóner týyndylarynyń kórmesi ótip jatyr.

Onda Batys Qazaqstan oblysynyń belgili sheberleri ózderiniń qoldan jasaǵan buıymdaryn atyraýlyqtarǵa usyndy. Olardyń arasynda sýretshi, ári dombyra jasaý sheberi Janpeıil Seıthanov, «Izýmrýdnyı gorod» ortalyǵy, «Meko» dızaın stýdıasynyń ókilderi men kóptegen qolónershiler bar.

2006 jyly qurylǵan «Ǵylymı zertteýlerdi qoldaý» qorynyń dırektory, Reseı ólketanýshylar odaǵynyń múshesi Aıbolat Qurymbaev jergilikti jerden osy kórmeniń ótýine demeýshilik tanytqan Gúljan Eleshevaǵa alǵysyn bildiredi.

– Bul shara «Aqjaıyq – sheberler qalasy» jobasy aıasynda ótip jatyr. Bizdiń qorda qazir júzden astam qolónershi tirkelse, osynda sonyń otyzy kelip otyr. Olar jármeńkelerge turaqty shyǵyp júr (Atyraýlyq qolónershilerge de óz ónerlerimen, tamasha týyndylarymen bólisý úshin arnaıy alań kerek-aq. Avtor.) Atap aıtsam, Batys Qazaqstan oblysynyń birneshe aýdandarynda, tipti, kórshiles Reseıdiń Samara qalasynda da boldyq. Al, Atyraýǵa alǵash ret at basyn burdyq jáne sońǵysy bolmas dep úmittenemin. Ekinshiden, «Kaspıı kýbogi – Jaıyq jaǵasynda» atty ulttyq sport túrlerinen halyqaralyq týrnırin tamashaladyq, – deıdi ol.

Sondaı-aq, atalǵan qor tarıhı ekspedısıalar uıymdastyryp, tarıhı-mádenı taqyrypta kitap basyp shyǵarýmen de aınalysady eken. Máselen, kezinde Bókeı ordasy oryn tepken aýdandardy aralap, kóne qulpytastardaǵy jazýlardy qazaq tiline aýdarǵan.