Eh, Patshaıym! Alty álemge araı shashqan ajaryń, Júregimniń tyńdap kórshi ǵazalyn, Menen onsha batyldyqty kútpeıdi el, Senen bolsa ókinbes em ajalym! Janarlaryn sendeı sulý qyz jegen, Esin aldyń erkekterdiń júzdegen. Par attyly Patshaıymym senip kór, Aq boz atty Hanzadańmyn izdegen. Jumbaq ediń janaryna syr búkken. (Tyńdap edim tún kúbirin túndikten.) Bizder túgel mártebeńniń aldynda, Taǵzym jasap, bas ıedi gúl bitken.   Nur sińirip ón boıyńa esti elden, Aq tánińdi jel sıpamaı ósken be eń?! Gúlge kelip, nárin sormaq aralar, Seniń qabaq qımylyńnan seskengen.   Eń birinshi saǵan nuryn tań shashyp, Aq sáýleniń sińiresiń barshasyn. Myń kóbelek alqa bolyp moınyńa, Kirpigińe qonyp jatyr qanshasy...   Qumar qanbaı kelbetińe qadala, Teńgermedim sulýlardy baǵańa. Hafız shaldan qalǵan iz ǵoı, meńińe, Astana men Almaty da sadaǵa!   Tifá-tifá, sadaǵa!  

Sen meni túsinbeısin. Men seni túsinbeımin. Al, buǵan jazyqty kim? Qıalda bir arýdy músindeımin, Ol sensiń – názik gúlim...   Sen maǵan ókpelisiń. Men saǵan ókpelimin. Bilmeımiz biraq nege? Janyńnyń kúlkisi – nur kóktemimin. Aramyz jyraq deme.   Sen meni kinálaısyń. Men seni kinálaımyn. Aıypty – eshkim emes. Súıgenim – baǵym emes, sirá, qaıǵym. Sorymmen bes kún eges...   Sen maǵan baǵalysyń. Men saǵan baǵalymyn. Tek keshteý uǵynǵansyń. Boıymdy balqyta-a-ady samal úniń, ...Tıispe! Muńym qalsyn.   Sen meni qıa almaısyń. Men seni qıa almaımyn. Tosamyz endi neni? Qıalmen úmitimdi jıi aldaımyn, Ol – baıǵus kóndigedi...   Sen meni saǵynasyń. Men seni saǵynamyn. Qaıtesiń, moıyndamaı? Men úshin alańdaryń taǵy málim, Júrmessiń ýaıymdamaı.   Seni alyp jıi esime, Sezimniń kıesinen, ­Qorqamyn... “Iem” qaqty... Sen meni súıesiń be? Men seni súıem qatty!!!

I Túrip tastap yzǵardyń ýaqytsha túndigin, Keldi keshe kóktemniń bizder kútken bir kúni.   Biraq meniń ishimde áli yzǵar, muńly baq, Kenet... tylsym qaǵady terezemdi urǵylap.   Eseńgirep qalam da... únsiz tysqa shyǵamyn, Shyǵysymda shıryqqan sol baıaǵy shuǵa kún. Maǵan qarap kúledi úmitimdi jutyp tań. Kún sáýlesi jatady janarymdy qytyqtap. Bult ishinde kil appaq túsiniksiz músinder, (Turam sosyn kúrsinip, óleń oqyp ishimnen) Sezemin ǵoı azaly saǵynyshty ol da muń, Kelgen qustar... keýdeme qıal bolyp ornady. Jatar ásem birinen qarlyqqan ún... kúı shalqyp, Qanatynan muńlyqtyń saǵynyshtyń ısi ańqyp. Túrtkileıdi ishimde áldebir muń, kúbirler, Son-a-aý qaıtqan qustardyń saǵynyshty úninde. Meniń ǵajap muńymdy ánge qosyp qus bitken, Sher-muńymnyń sharabyn qańǵyr ıtpen ishtik teń.   Sodan jerge quladym bótelke bop ishilgen Jatam sosyn máńgirip salystyryp túsimmen. II Kúnde batqan... Qaıtadan bılep aldy tereń muń. Oı qushamyn taǵy da óziń jaıly men endi. Telefonǵa telmirgen beıýaqtaǵy shaqtarda, Sen de maǵan, men saǵan, muń aıtamyn hattarǵa: Jyndanatyn shyǵarmyn, aınaldyrǵan alqash ý! TÚSİNBEIMİN qalqam-aı, nesin, neden qorqasyń?! ...Keı sáttegi sózderiń úmit ete jandy úrgen, Jalǵanymnan baz keshe jylatasyń, al birde... Tabar ma eken daýasyn, alty aınalsam álemdi. Emde deısiń óziń kep... túsinip kór, al endi. Aıtshy qalqam, ońaı ma, túsindirshi qalaı bul? Bálkı bolyp janyńda em izdermin talaı kún. Jetti mendik tózimde, qalǵan tolyp qusa muń, Erteń qalqam kút meni... Óziń jaqqa ushamyn!  

Peri qyzyn izdep shyqtym jolǵa men, Seńgir-seńgir taýlar asyp sorlap em. Jelmaıaǵa minip alyp jer shaldym, İlbip basyp kele jatyr ol da áreń.   Apyrma-aı, qaı baǵyttan tabamyn? Qarmaǵymdy qaı ózenge salamyn? “Sý sultany Peri qyzy násip” – dep, Qatyrdy ma álgi balger – qaraǵym?   Tórt ózenge kezek baryp tóngeli, Úmitimniń bir sáýlesi sónbedi: Edilge kep eńkildedim eldegi, Syrǵa kelip syr aqtardym senbedi.   Aq Jaıyq ta ińkárlikti mendegi, Sorǵa aınalǵan jaǵasyna jerledi. Eń aqyry Ertiske de órdegi, Baryp edim eshteńe de ónbedi.   Qarmaǵymdy qappaǵan qyz qaıdasyń? Armanymdy taptaǵan qyz qaıdasyń? Peri qyz ǵoı periligin tanytyp, Álde menen asyrdy ma aılasyn?   Jasyl-jasyl janyń – kóktem, tániń – nur, Qaıtken kúnde jetem saǵan báribir. Tabanymnan taýsyldyrmaı joldan shyq, Kóp ishinen óz baǵyńdy tanyǵyr.   “Tek tili joq, symbatynda esh min joq” Eh, Peri qyz kóńilimde kóshtiń kóp. Asan qusap qasiretten qan jutyp, Bizdiń sezim bitip qalmas bes kún bop.   Saǵynyshtan sartap bolǵan myń óleń, Meniń ishki álemimde túlegen. Júrektegi jyr dápterden jatqa oqyp, ...Mylqaý qyzǵa til bitirip jiberem.   Tabylǵasyn qosaǵymyz, teńimiz, Baqytty bop kún keshemiz tegi biz. Sodan keıin, sodan keıin, sosyn ba? ...Perishtege aınalady Peri qyz!!!