Sheraǵańsyz ótken 40 kún...
Qazaq qaýymy Sheraǵańsyz 40 kúnin ótkizdi. Osy aralyqta ózindik úni, minezi, bolmysy bar asyl aǵamyzdyń orny oısyrap turdy. Talaı arhıvtik teletaspa materıaldary eldiń nazaryna usynyldy. Sonyń birinde jap-jas derlik, jigerli, aıtary nyq Sheraǵań endi ǵana táýelsizdik alǵan elimizdiń birinshi basshysyna qaratyp sóz aıtady. Halqymyzǵa adal da abyroıly qyzmet etýdi shegelep jetkizedi.
Ǵajap-aq!
Ókinishtisi, bılik tizginin ustaǵan kisi jolynan jańyldy. Sheraǵamyz renjidi. İshtegi nalasyn jasyra almady. Qatty aıtqandy bıliktegi kisi de unatpady. Sol yqylasy ol kisimen qoshtasqan aqyrǵy kúni de anyq ańǵarylyp turdy...
Qara jerdiń qoınynda jatyp ta, jer betindegi eldi biriktiretin, ortaq maqsatqa jumyldyratyn rýhy asqaq adamdar bolady. Alashtyń arystary solaı edi. Sheraǵa, Sizdiń keıipkerińiz - Turar Rysqulov solardyń sanatynan edi. Siz de solaı ekensiz!
Sheraǵa, siz kóz jumǵaly ózińizge arnalǵan qanshama dúnıeler jazyldy. Bir osaly joq. Taǵy da jazylyp jatyr. Bárinde Sizdiń ór minezińiz, órshil kóńilińiz, elge degendegi bólekshe qasıetińiz barynsha ashylady. Sizdiń erligińizdi aıtady. Elbasynyń aldyndaǵy ustanymyńyzdy úlgi etedi, maqtaıdy. Shirkin-aı, qolynda bıligi bar, qasıetti qalam ustaǵan azamattardyń bári bolmasa da, arasynda daralanǵandar bolsa, káne! Qýǵyn-súrgin jalǵasýda. Jer úshin kúres júrip jatyr. Qoldan jıhadshy, terrorshy jasalýda. Bári bizdiń qandastarymyz. Qazaq jerin qylmyskerler jaýlap alǵan sekildi. Túrme toly – qazaqtar. Solardyń 65-70 paıyzy el qorǵaıtyn, urpaq órbitetin qyz-jigitter, olardy qamap ustaýdyń ózi - kúná. Bar min memleket tizginin ustaǵan bılikte. Eki qoldaryna bir kúrek tabylsa, sóıter me edi, Sheraǵa?..
Siz qasıetti jer qoınynda jatyp ta artyńyzda qalǵan qazaǵyńyzdy oılaısyz. Meımildegen baılyqtyń ústinde terbelip otyrýdyń ornyna, bul qazaǵyńyz, qazaǵyńyzdyń ul-qyzdary tentirep júr, Sheraǵa...
Qashanǵa deıin kúızeler ekenbiz?
Siz Jaratýshy ıemizge bir taban jaqynsyz. Patshamyzdyń aldynda ımenbeı aıtqan sózińizdi, ótinish-tilegińizdi, muńyńyzdy jetkizińizshi. Siz uly qazaqtyń adal uly boldyńyz. Asyp-tasqan qandastaryńyzdy bilmeımin, elim, jerim, týǵan tilim deıtin baýyrlaryńyzdyń bári Sizdi jaqsy kóredi, qaldyrǵan rýhanı murańyzdy oqıdy, maqtan etedi. Ózińizsiz arada ótken kúnder men túnder meni osylaı terbep otyr, Sheraǵa!
Peıishtiń shýaǵyna bólenip, tórinen tabylyńyz, Sheraǵa!!!
Talǵat Aıtbaı. Feısbýktegi paraqshasynan
