Bizdiń eldiń búdjetinen halyqty áleýmettik qorǵaý, sonyń ishinde jumyspen qamtýdy qoldaýǵa bólinip jatqan qarajattar ornymen jumsalatyn bolsa, endigi jumyssyzdyq degen múlde bolmas edi. Alaıda bólinip jatqan orasan qarjyǵa qaramaı onyń úlesi azaıar emes. Eńbek jáne halyqty áleýmettik qorǵaý mınıstrligi jumys istep jatyrmyz, jumyssyzdyqty azaıtyp jatyrmyz degenimen jumyssyzdyqtyń úlesi bir orynnan jyljymaı tur eken.
Bul týraly Májilistiń sońǵy plenarlyq otyrysynda depýtat Aıqyn Qońyrov jarıa etti. Aldymen depýtat Jumyspen qamtýdyń 2019-2021 jyldarǵa arnalǵan baǵdarlamasyna úkimettiń ózgeris engizgenin synady. Ózgeris engizbes buryn burynǵy baǵdarlamanyń qalaı oryndalǵanyn jáne usynylǵan ózgeristerdiń qanshalyqty qajettiligi baryna sarap jasalýy kerek edi deıdi depýtat. Munyń ornyna shyndyǵy kúmándi sandyq kórsetkishterge senip, ózgerister engizilgen. Máselen, Eńbek jáne halyqty áleýmettik qorǵaý mınıstrligi ústimizdegi jyldyń toǵyz aıynda bólingen 82 mlrd. teńgege 327 myń adam jumysqa ornalasqan deıdi. Demek, jumyssyzdyq azaıýy kerek edi ǵoı. Biraq statısıka organdary onyń 2017 jyldyń basynan beri ózgermeı, 4,9 paıyz deńgeıinde turǵanyn aıtqan. Demek, eki qyzmettiń biri jalǵan sóılep tur. Naqtyraq aıtsaq, statısıka organdarynyń málimetine qaraǵanda ústimizdegi jyldyń İ toqsanynda jumyssyzdar sany 439 myń adam bolǵan, al İİ toqsanda ol sál artyp, 441 myń adamǵa jetken. Endeshe Eńbek mınıstrliginiń 327 myń adamy kimdi nemese neni azaıtqan?
Sonymen qatar depýtat A.Qońyrov jańa jumys oryndaryn ashýdy yntalandyrý da tómen ekenin synady. Máselen, bıyl tek 1042 joba ǵana qoldaý taýyp, mıkrokredıttik ádispen qarjylandyrylǵan. Bul san jalpy respýblıkaǵa shaqqanda túk emes deıdi depýtat. Eger kórsetkishter jaqsarmasa orasan qarajat qaıda quıylyp jatyr? Eńbek mınıstrliginiń aqparattary shyndyqqa qanshalyqty janasady? Osy jáne basqa máselelerdi tekserip, sarap jasaýdy surap, depýtat úkimet basshysy B.Saǵyntaevtyń atyna depýtattyq saýal joldady.
S.Eleý, sarapshy
