Gúlvıra Bıǵalıeva - Retro FM radıosynda habar júrgizýshisi. Radıo ornalasqan ǵımaratqa "bomba qoıyldy" degen aqparatty estise de, Gúlvıra jumys ústelin tastap, at-tonyn ala qashqan joq. Halyqqa mańyzdy jańalyqty jetkizýge asyqty. 

♦KTK redaksıasyna bomba qoıylǵandyǵy týraly qońyraý tústi

"Bizde búgin masqara kún boldy. "Saǵat túski 13:00-ge qaraı KTK, NTK, Eýrazıa arnalarynyń ǵımaratyna bomba qoıylǵan" degen aqparat túsken kezde, polısıa búkil qyzmetkerlerdi syrtqa qýalady. Qalpaǵymdy kıip men de syrtqa qaraı qashyp bara jatsam, 13:00-ge bes mınýt qalypty. Sasqanymnan Retrodaǵy efırime qaraı qaıta júgirdim. Efırge kelip otyryp jatsam, "ne, óleıin dep pe ediń, shyq deımin dep" "Retroǵa" da polısıa kirip keldi. "Bes mınýt qaldy, tyǵyz jańalyqtarymdy aıta salaıynshy" dedim de, polıseıdiń aýzynan estigen aqparatymdy jedel efırge shyǵardym. Basymdaǵy bas kıimimdi jańalyqty oqyp bitken soń baıqadym. Qashyp bara jatyp jańalyq oqyǵan jaqsy eken. Oqyp bitken soń báribir meni qýalap shyqty. Bárimizdi qudaı saqtasyn. Tyrqyldap qashqan, ne degen jaman", - dep tótenshe jaǵdaı barysyndaǵy emosıasymen bólisti jýrnalıs Gúlvıra Bıǵalıeva. 

Gúlvıra hanymnyń bul áreketi áriptesteri tarapynan úlken qurmetke ıe boldy. Jelide ol "jankeshti jýrnalıs", "batyr jýrnalıs" atanyp, kópshiliktiń rızashylyǵyna bólendi. 

♦Bomba jaıly aqparattyń astarynda jýrnalıserge qarsy qastandyqtyń bolýy múmkin be?

2006 jyldyń 5 maýsymynda "Aıqyn" jáne "Lıter" gazetteri ornalasqan ǵımarat ta órtke oranǵanynan jurtshylyq habardar. Barlyq qyzmetkerler syrtqa júgirgende,, "Aıqynnyń" sol kezdegi jýrnalıseri Teljan Kúderov jáne Maqsat Ádilhan órt bolyp jatqan ǵımaratqa qaıta kirip ketedi. Sondaǵy maqsattary - gazettiń mańyzdy málimetter bazasyn aman alyp qalý edi. Bul týraly redaksıada qyzmet atqarǵan jýrnalıs Berik Beısenuly bizge áńgimelep berdi.

Óz ómirinen jumysyn birinshi orynǵa qoıatyn, qyzmetine adal jýrnalıser kemde-kem. Halyqqa qyzmet etýdi maqsat tutqan mundaı mamandar qashan da zor alǵysqa, qurmetke laıyq.