Parıj basshylyǵy 8 jeltoqsan, senbi kúni janarmaı salyǵyn qymbattatýǵa qarsy ereýilderge baılanysty týrıser kóp baratyn Eıfel munarasyn ýaqytsha jabady. Reuters agenttiginiń habarlaýynsha, merıa ereýil sońy tártipsizdikke ulasady dep qaýiptenip, Elıseı alańyndaǵy dúkender men meıramhanalardy ýaqytsha jabýǵa shaqyrdy. Senbige belgilengen barlyq qoǵamdyq is-shara ótkizilmeıtin boldy dep jazady Qamshy.kz aqparat agenttigi Azattyqtyń deregin negizge alyp.
Parıjdegi ondaǵan murajaı, onyń ishinde Lývr murajaıy qarsylyq aksıalaryna baılanysty senbide jumys istemeıtin boldy. Murajaılar basshylyǵy manıfesanttar tártipsizdik jasap, murajaıdy qıratýy múmkin dep qaýiptenedi. Sonymen qatar, merıa Parıjdiń birneshe aýdanynda bıznes ıelerinen qosymsha qaýipsizdik sharalaryn jasaýdy surady.
Fransıada narazylar bılikten janarmaı salyǵyn qymbattatpaýdy talap etip, ereýildetip jatqanyna úsh apta boldy. Ereýilderdi «Sarǵylt jılet» qozǵalysy uıymdastyryp otyr.
Ótken senbide Parıjde bolǵan demonstrasıaǵa bıliktiń málimetinshe 75 myń adam qatysty. Demonstrasıa sońy tártipsizdikke ulasyp, 130-dan astam adam zardap shekti, 400-ge tarta adam tutqyndaldy. Betperde kıgen adamdar dúken sórelerin qıratyp, Saltanat qaqpasyn zaqymdady. Parıj merıasy tártipsizdikterden kelgen shyǵyndy 3-4 mıllıon eýro dep baǵalap otyr.
Narazylyq sherýlerinen soń 5 jeltoqsanda Fransıa úkimeti janarmaı salyǵyn ósirýge alty aı merzimge moratorıı jarıalady.
