Elimizdiń elshiliginiń uıymdastyrýymen Oslo qalasynda «Norvegıadaǵy Qazaqstannyń Ulttyq kúni» ótti. Sharaǵa Norvegıa Koróldiginiń bılik, saıası partıalar, memlekettik emes jáne qoǵamdyq uıymdar, BAQ, bıznes, dıplomatıalyq korpýs, sondaı aq jergilikti qazaq dıasporasynyń ókilderi jınaldy.
Qazaqstan dıplomattary qonaqtar nazaryna Elbasy Nursultan Nazarbaevtyń «Qazaqstan joly» kitabyn norveg tilinde, Sırıadaǵy shıelinisti jaǵdaıdy sheshýdegi Astananyń úlesi týraly «Bitimger» eńbegin taǵy basqa kitaptaryn aǵylshyn tilinde usyndy.
Jıynǵa qatysýshylar Qazaqstan Prezıdentiniń «ATOM» bastamasyna qoldaý bildirip, iske asyrý maqsatynda ıadrolyq synaqtardy toqtatý jónindegi petısıaǵa qol koıý aksıasyna qatysty. Norvegıa dinı uıymdarmen baılanys Keńesiniń basshysy Ingrıd Rozendorf: «Bul zamanaýı asa qajet bastamany qoldaımyn. Men Qazaqstannyń basqa da halyqaralyq bastamalarymen jaqsy tanyspyn. Qazan aıynda Astanada ótken álemdik jáne dástúrli dinderdiń sezine qatysyp, Qazaqstan Prezıdenti men Úkimeti dinder aralyq dıalogty barynsha jeńildetýge qyrýar jumys jasap jatqanyna kúá boldym. Bul Norvegıada bizdiń atqaryp jatqan sharýalarmen úndes. Qazaqstan – jyl saıyn konfesıalar sany ósip kele jatqan el. Dinniń kóptigi azamattyq qoǵamnyń, ózara túsinistiktiń damýynyń kepili dep bilemin. Qazaqstannyń dinaralyq seriktestikti álemdik deńgeıde belsendi nasıhattaýy bizdi tamsandyrady.
Shaqyrylǵandar Elbasynyń Qazaqstan Halqyna Joldaýynda jarıa etilgen bastamalarymen jáne jaqynda jaryq kórgen «Uly dalanyń jeti qyry» maqalasynda aıtylǵan ulttyq tarıhymyzdyń, mádenıetimizdiń jahandyq órkenıetke qosqan úlesi týraly keńinen tanysty.
Sondaı aq, qonaqtarǵa Qazaqstannyń týrısik múmkindikteri arnaıy tanystyryldy. Qazaqstannyń týrısik habynyń jańa múmkindikteri jaıly «Qazaq týrızm» otandyq kompanıasy men keler jyly turaqty túrde Uly dala eline týrısik saparlar uıymdastyrýdy qolǵa norvegıalyq «Vıtýs» kompanıasy jınalǵandarǵa tolyqqandy aqparat berdi. «Maksıshıpıng» logıstıkalyq kompanıasynyń komersıalyq dırektory Krıstıan Klemmetsen: «Qazaqstannyń týrısik múmkindikterimen qatar tranzıttik, logıstıkalyq múmkindikteri de bizdi qyzyqtyrady. Bizdiń júk tasymaly temirjol poezdary Eýropadan Ortalyq Azıaǵa taýar tasıdy. Sondyqtan Qazaqstannyń qurlyqtaǵy logıstıkasyna suranys joǵary. Shynynda da, bul óte tıimdi marshrýt, teńiz jolynan jyldam, áýe qatynasynan áldeqaıda arzan».
Qazaqstan Prezıdentiniń ulttyq sanany túletken «Uly dalanyń jeti qyry» maqalasynda aıtylǵan tereń oılardy jahanǵa jetkizý maqsatynda, qazaqtyń tarıhy men mádenıetinen mol maǵlumat beretin «Sán men Sahna» halyqaralyq festıvaliniń kórsetilimi boldy. Festıvál dırektory, belgili etno dızaıner Haným Aıdashtyń bul skandınavıa eline ekinshi sapary. Osy joly festıvál sheńberinde norvegıalyqtarǵa qyzylordalyq etnodızaıner Qarlyǵash İlásova men aqtaýlyq Móldir Bekibaevanyń «Shyn júrekten» koleksıasy tanystyrylyp, jınalǵandardy tamsandyrdy.
Oslo qalasyndaǵy «Kon-Tıkı» murajaıynyń dırektory Martın Bıl: «Men úshin Norvegıadaǵy Qazaqstan kúnine qatysý úlken qurmet. Qazaq ulttyq kıim úlgileri tanystyrylǵan shoý óte keremet boldy. Qazaqstan Norvegıadan óte alys, sondyqtan men mıllıondaǵan skandınavıalyqtar sanatynda qazaq jerimen, mádenıetimen tanys emes edim. Alaıda, búgingi sharanyń arqasynda Uly dala elimen de, halqymen jaqynyraq tanysyp, tánti boldym. Tipti ózimizben uqsastyqtar taýyp tań qaldym!»
Sýretteri álemniń ondaǵan elderinde jekelegen koleksıalarda saqtalǵan, belgili sýretshi, Qazaqstan eńbek sińirgen mádenıet qaıratkeri Gúlmıra Telǵozıevanyń sýret kórmesi de Uly dala órkenıeti men ulttyq bolmysymyzdy vıkıngter eline tanytýdyń zańdy jalǵasy ispettes boldy.
«Norvegıadaǵy Qazaqstannyń ulttyq kúni» Qazaqstan táýelsizdiginiń 27-jyldyǵyna arnalǵan dıplomatıalyq qabyldaýmen aıaqtaldy. Jıyn barysynda Norvegıa Koróldigindegi Qazaqstannyń ýaqytsha senimdi ókili İlás Omarov eki jaqty baılanysty damytý baǵytynda ústimizdegi jyly atqarylǵan jumystar jaıly aıtyp berdi. Dıplomat Qazaqstan Norvegıa elimen jan jaqty keńinen seriktestik ornatýǵa nıetti ekenin, «sondyqtan qazaqstandyqtar fordtar eli týraly, al norvegıalyqtardyń uly dala eli jaıly tanymy barynsha ósetini sózsiz» dedi.
Vıkıng Batyrov, Oslo
