Memleket basshysy Nursultan Nazarbaev Qazaqstan Respýblıkasynyń Táýelsizdik kúnine arnalǵan saltanatty jıynda qazaqstandyqtardy elimizdiń basty merekesimen quttyqtady, dep habarlaıdy Qamshy.kz aqparat agenttigi Baq.kz portalyna silteme jasap.
«Bul – qyran qustaı erkindikke umtylǵan halqymyzdyń ǵasyrlar boıǵy asyl armany oryndalǵan kún. Táýelsizdik – júregi elim dep soqqan árbir qazaqstandyq úshin asa qadirli, aıryqsha ardaqty uǵym. «Adam baqytty ómir súrýi úshin, onyń táýelsiz Otany bolýy qajet» degen danalyq sóz bar. Búkil halqymyz aqsarbas aıtyp, egemendik baıraǵyn kókte jelbiretkenine, mine, 27 jyl tolyp otyr. Osy ýaqyt ishinde Qazaqstan tamyryn tereńge jaıyp, órisin keńeıtip, kemeldene tústi. Synaǵy kóp syndarly kezeńnen súrinbeı ótip, mártebesi bıik, tuǵyry berik, mereıli memleketke aınaldyq», - dedi Elbasy.
Memleket basshysy Eýrazıanyń júreginde ornalasqan jańa elorda – jańǵyrǵan Qazaqstannyń sımvoly sanalady dep atap ótti.
«Bıyl Aqordaly Astanamyzdyń 20 jyldyǵyn jurt bolyp jumylyp, joǵary deńgeıde atap óttik. Bul mereıtoıǵa elimizdiń barlyq óńiri atsalysyp, shaharymyzdyń kórkeıe túsýine zor úles qosty. Elimiz búginde álemdik básekege qabiletti 50 eldiń qatarynda. Jahan jurtshylyǵy Qazaqstandy moıyndap, senimdi seriktes retinde tanydy. Óńirlik problemalardy sheshý isinde salıqaly saıasat ustanǵan bizdiń uranymyz árdaıym tatýlyq pen turaqtylyq boldy. Qazirgi tańda memleketimiz halyqaralyq uıymdardyń bitimgerlik jumystaryna belsene atsalysýda. Jıyrma birinshi ǵasyrdyń ekinshi onjyldyǵynda Qazaqstan jańa belesterdi baǵyndyrýǵa kiristi», - dedi prezıdent.
Elbasy bıylǵy qańtar aıynda Birikken Ulttar Uıymynyń Qaýipsizdik Keńesine tóraǵalyq etýimiz – sonyń aıqyn dáleli dep atap ótti.
«Qazaqstan eki jyl boıy osy Keńestiń turaqty emes múshesiniń mártebeli mısıasyn atqaryp keledi. Beıbitshilikti jaqtaıtyn memleketimiz osylaısha halyqaralyq qaýymdastyqqa keńinen tanyldy», - dedi Nursultan Nazarbaev.
Pikir qaldyrý