Soltústik Koreıa lıderi Kım Chen Yn árdaıym jıyndarǵa óziniń jubaıy Lı Sol Chjýmen kelýdi dástúrge aınaldyrǵan. Beıjińge QHR basshysymen kezdesýge Kım taǵy da zaıybymen kelgen. Resmı kezdesýde jıi kórinetin Lı Sol Chjý týraly aqparat múlde az. Sonymen, Kım Chen Ynnyń "jumbaq jary" týraly ne bilemiz?
Ol alǵash ret 2011 jyly telejańalyqtarda kórindi. Kórermender Kım Chen Irdi (Kım Chen Ynnyń ákesi — Red.) jerleý rásimi kezinde Kım Chen Ynnyń janynda turǵanyn baıqaǵan. Degenmen, onyń kim ekenin ol ýaqytta eshkim de bilmegen.
2012 jylǵa deıin ony bári Kım Chen Ynnyń qaryndasy nemese alys týysy dep oılap kelgen.
Tipti, Ońtústik Koreıanyń barlaý qyzmeti ony "Pochhonbo" ansambliniń ánshisi degen aqparat taratqan. Sebebi, sol kezde Soltústik Koreıa bıligi turǵyndardan ánshiniń dıskterin jınaǵany týraly rastalmaǵan aqparattar taraǵan bolatyn.
Ózge de aqparat kózderinde Lı Sol Chjý 2005 jyly Ońtústik Koreıada jeńil atletıkadan ótken Azıa chempıonatyna soltústik koreıalyq komanda quramynda qoldaýshy toppen birge barǵany jazylǵan.
Al onyń Kım Chen Ynmen úılenýi jaıly soltústik koreıalyq BAQ tek 2012 jyly shildede jarıalaǵan. Bul aqparatty teksergen Ońtústik Koreıanyń barlaý qyzmeti toıdyń úsh jyl buryn bolǵany týraly boljam aıtady.
Kım Chen Ynnyń áıeliniń esimi de belgisiz
2018 jylǵa deıin resmı basylymdarda ony «joldas Lı» dep jazyp keldi. Qazir onyń jańa ataǵy paıda boldy — "Qurmetti, birinshi hanym". Soltústik Koreıa dınastıasynda esimdi ózgertý burynnan qalyptasqan. Sol sebepti áli kúnge onyń shyn esimi Lı Sol Chjý ekeni tolyq anyqtalmaǵan.
Koreıanyń birinshi hanymy qandaı otbasynda dúnıege kelgen?
Lı Sol Chjýdyń balalyq shaǵy jaıly resmı aqparat joq. "North Korea Leadership Watch" basylymynyń redaktory Maıkl Medden onyń Soltústik Koreıanyń shyǵys jaǵalaýyndaǵy Chhondjın qalasynda dúnıege kelgenin jazady. Phenándaǵy Kım Ir Sen atyndaǵy ýnıversıtette bilim alǵandyǵy jaıly aqparat bar. Keıbir derekkózde onyń ákesi dáriger bolǵan dese, endi biri áskerı ofıser dep kórsetedi. Onyń Kım Chen Ynmen qalaı tanysqany da qupıa bolyp qaldy.
Prezıdenttiń qansha balasy bar?
Lı Sol Chjý men Kım Chen Ynnyń úsh balasy bar degen derekter kezdesedi. Degenmen, aqparat 100 paıyz rastalmaǵan. Mundaı aqparattyń taralýyna Kımniń zaıybynyń uzaq ýaqyt kópshilik aldyna shyqpaýy sebep bolǵan. Basylymdar "2010 jyly Lı Sol Chjý ul balany dúnıege ákeldi" dep jazsa, "2012 jyly onyń taǵy aıaǵy aýyr bolýy múmkin" degen aqparat taraǵan. Ońtústik Koreıanyń barlaý qyzmeti "2017 jyly Lı Sol Chjý úshinshi sábıin dúnıege ákeldi" dep boljam jasady.
Soltústik Koreıanyń birinshi hanymy qalaı sándenedi?
Sýretterden Soltústik Koreıanyń birinshi hanymy batystyq qymbat ári sándi kıimderdi unatatynyn baıqaımyz. Japondyq aspaz Kendzı Fýdzımoto Kım áýletiniń birneshe jyl bas aspazy bolǵan. Ol 2012 jyly Lı Sol Chjýmen kezdesýi jaıly esteliginde onyń daýysy jaǵymdy ári ózi sánqoı bolǵan deıdi. Ataqty "Christian Dior" brendiniń sómkesin tartý etkendigin de jazady.
Sýretterden Lı Sol Chjýdyń "Dior" jáne "Chanel" brendteriniń sómkesin unatatynyn baıqaımyz. Kóptegen basylymdarda Kımniń jumbaq jary "Red Valentino", "Dior", "Tiffany", "Movado" syndy brendterge basymdyq beretinin baıqaǵan.
