Egin jınaýǵa qanatty sózdiń qandaı qatysy bar deýińiz bek múmkin. Elindegi ashtyq pen azyq-túlik tapshylyǵyn jurtshylyqtan jasyrýǵa nıet etti me eken, Túrikmenstan prezıdenti Gýrbangýly Berdimuhamedov taǵy bir qadamǵa bardy. Prezıdent eldiń atqarýshy bıligimen kezdesý kezinde aýyl sharýashylyǵyn reformalaýǵa qatysty jıyn ótkize kelip, jerge qatysty qanatty sózderdi jınaýdy tapsyrdy. Endi túrikmendik mamandar astyqpen qatar maqal-mátel de jınaıtyn bolady.
–Bıdaı men maqta jınaý ońaı emes. Biraq onyń barlyǵyn biz ata-babamyzdan kele jatqan tarıhı dástúrge súıene otyryp jasaýymyz kerek. Ár jerdiń óz qunary, óz ereksheligi bar. Muny atadan qalǵan babalar sózimen úılestirmese bolmaıdy. Sondyqtan arnaıy sózdik jasaǵan durys. Muny Túrikmenstan aýyl sharýashylyǵy ýnıversıtetiniń mamandary júzege asyrǵany jón, –dep tapsyrma berdi prezıdent Gýrbangýly Berdimuhamedov.
Dál qazir resmı derek boıynsha Túrikmenstanda azyq-túlik tapshylyǵy baıqalady. Biraq bul másele bılik tarapynan ashyq aıtylyp otyrǵan joq. Keıbir derekterge qaraǵanda, un, qant, ósimdik maıy 30 paıyzǵa azaıǵan. Tipti syrttan sút ónimderi ákelý - 60 paıyzǵa, shujyq ónimderi 40 paıyzǵa tómendegen.
Biraq Prezıdenttiń ózi ash emes. Jańa jylda Ashhabadta Ortalyq Azıadaǵy eń úlken shyrsha ornatyldy. Ol nemeresimen birge aǵylshyn, nemis jáne túrikmen tilinde án aıtyp, el halqyn quttyqtady. Biraq...
Jańa jyl túrikmenderge aýyrlyǵyn ala keldi. 1 qańtardan bastap turǵyndar óz aqshasyna elektr qýaty, sý men gazǵa eseptegish quraldaryn ornatýǵa tapsyrma aldy. Eger eseptegish quralyn ornatpasa, turǵyndar oǵan qatysty eshqandar qajetti qujattardy ala almaıdy jáne sýsyz, jaryqsyz, gazsyz qalady. Sonymen qatar, aıyppul tóleıdi. Sóıtip 1992 jyldan beri jasalynyp kelgen «túrikmen jumaǵynyń» kúni bitti. Qazir halyqta aqsha joq, azyq-túlik tapshy, jaǵdaı qıyn. Biraq Túrikmenstan prezıdenti án aıtyp júr. Ol eldegi búkil qara kólikti aqqa boıatty. Qaladaǵy búkil ǵımarattar aq túske ózgerip jatyr. Bıliktiń qatań tapsyrmasyna sáıkes, halyqtyń meshitke barýyna tyıym salynǵan, din taqyrynda áńgime aıtýǵa bolmaıdy. Jumys ornynda namaz oqý durys emes. Eger ony bıliktegiler bilip qoısa, onda jumystan aırylady. Jalpy Túrikmenstanda jaǵdaı qıyn, sońǵy tapsyrmanyń ózi kúlkili, túrikmender astyqpen qatar qanatty sóz jınaıtyn boldy. Bul da túsinikti shyǵar, óıtkeni erteń túrikmen halqynyń maqal-mátelderi uly prezıdent «arkadag – el qamqorshysy» Berdimuhamedovtiń jınaǵy bolyp shyǵa keledi emes pe?!.
